Elurra Lea-Artibain eta Mutrikun

Lea-Artibai eta Mutrikuko Hitza

Amoroto,Aulesti,Berriatua,Etxebarria,Gizaburuaga,Ispaster,Lekeitio,Markina-Xemein,Mendexa,Munitibar,Mutriku,Ondarroa,Ziortza-Bolibar

2018/02/28

Iragarrita zegoen, eta halaxe izan da. 02:00etan dena garbi bazegoen ere, 04:00etatik aurrera dena zuritzen hasi da. Eta goizean goiz gorabehera asko gertatu dira: lanera joateko autoa hartu eta aldapan gora egin ezin zutenak, autoa ateratzeko gorriak eta bi ikusi eta azkenean bertan behera utzi dutenak… Arazoak arazo, Lea-Artibai eta Mutriku elurrez estali dira. Markina-Xemeingo Karmengo eliza aurreko aldatzean zirkulazio arazoak sortu dira goizeko lehen orduetan; beherantz zihoazen auto batzuk irrist egin eta hesia jo dute. Horrez gain, aldatza igo ezinik gelditu da kamioi bat, eta bertan egon da geldirik bidea garbitu dutenera arte. Zelai barrenean ere kolpeak egon direla azaldu du Udaltzaingoak. Errepideko elurra garbitzeko, goizetik ibili dira makinak herri guztian zehar, bai udaletxekoak bai eta suhiltzaileenak ere. 05:00etan hasi dira Markina-Xemeingo parkekoak errepideak garbitzen.

[zuzenean ARGAZKI GALERIA IKUSI]

Ondarroa eta Lekeitiorako bideak garbitu dituzte goiz erdirako eta Gontzugarai mendatea ere eguerdirako garbitu dute norabide bietan. Auto bat gurutzatuta gelditu da goizean Etxebarriko Beide parean, baina istripu larririk ez dela egon azpimarratu du Jesus Iriondo alkateak. Unibertsitatean eta beste herri batzuetako ikastetxeetan ikasten duten ikasle eta irakasle asko ere eskoletara iritsi ezinda geratu ziren eta egon zen Ondarroatik unibertsitatera iristeko ia hiru ordu behar izan duenik ere. Ikastetxe askok gutxieneko zerbitzuak eskaini dituzte, eta besteetan ere ikastorduak ez dira ohikoak izan. Gainera, elurragatik unibertsitateko eskolak bertan-behera gertzen zirela zioen ohar bat zabaldu da WhatssAppez, eta horrek nahasmena sortu du ikasleen artean. Autobus zerbitzuak ere etenda egon dira goizean, eta 11:00etatik aurrera berrabiarazi dute zerbitzua.

Argazkian: Markina-Xemeneigo Lea Artibai Ikastetxea

Erlazionatutako edukiaARGAZKI GALERIA: Elurra Lea-Artibain eta Mutrikun