Euskal Kostaldeko Museoen hilabetea jardueraz beteta dator
Aurten Kultur Ondarearen Europako urtea dela kontuan hartuta, egitarauko ekintza askok museoetan gorde, zaindu eta erakusten den ondare material eta ez materiala izango dute ardatz.
Eusko Jaurlaritzaren Turismo, Merkataritza eta Kontsumo Sailaren eta Bizkaiko eta Gipuzkoako foru aldundien laguntzarekin, Basquetourrek bultzatutako ekimena da. Hala, Euskal Kostaldeko Museoen Sarean dauden bertoko museoek ere parte hartuko dute: Ekoetxea Urdaibaik, Gautegiz Arteagako Urdaibai Bird Centerrek, Gernika-Lumoko Euskal Herria Museoak eta Bakearen Museoak eta Bermeoko Arrantzaleen Museoak, Lekeitioko San Katalina itsasargiak eta Mutrikuko Nautilus-Ikasgune geologikoak.
Asteburuan hasi eta martxoaren 31ra bitartean, horiek guztiek ateak irekitzeaz gain, adin guztietako herritarrei zuzendutako jarduerak izango dituzte aukeran: familientzako tailerrak, haurrentzako jolasak, bisita gidatu bereziak, doako sarrerak, ibilaldiak, proiekzioak edota irteera gidatuak.
