Emakume garbitzaileak: "Ez dago klase borrokarik emakumeen askapenik barik"
Garbiketa lanetan aritzen diren emakumeen lan baldintzak oso prekarioak direla esan dute ELA sindikatukoak diren garbitzaileek. Bihar Martxoaren 8a dela baliatuz, zenbait aldarrikapen eta salaketa egin dituzte eraikinetako garbitzaileen egoeraren inguruan.
Esan dute sektore hori “feminizatua egotea” ez dela kasualitatea, eta esparru pribatuan daukala jatorria; lan horiek esparru pribatutik esparru publikora igarotzean baldintza txarragoekin egiten da. Gogora ekarri dute garbitzeak inolako aitorpenik ez duen arren, ezinbestekoa dela. “Gu gara, nahiz eta ikusezinak izan askotan, bulego, eskola, kirol instalakuntza eta abar garbi eta berriz erabiltzeko prest lagatzen dugunak”.
Herritarren aldetik eta baita jasotzen dituzten soldatei dagokienez egiten zaien aitortza gutxiaren erantzuleak udalak ere badirela esan dute, egoera duin batean lan egiterik ez duten garbitzaileen gehiengoak udal eraikinak eta eraikin publikoak garbitzen baititu. “Udalek guk eskaintzen dugun zerbitzua azpikontratatzea erabakitzen dute, eta geroz eta gehiago dira esleitze publikoetan jasaten ditugun murrizketak”. Gaineratu dute baldintza horiek enpleguen galera, jardunaldien murrizketa eta lan baldintzen galera ekartzen dutela. Baina kexa ez dago bakarrik beraien lan baldintzetan.
Garbitzaileak, prentsaurrekoan.
Garbitzaile gizon eta emakumeen artean ere aldeak daudela azpimarratu dute: “Adibide bat ematearren, gu bezala eraikin publikoak garbitzen aritzen den eta lurraldeko hitzarmena aplikatzen zaion garbitzaile batek 15.174 euro irabazten ditu urtean. Kaleak garbitzen dihardutenek, berriz, orokorrean sektore maskulinizatua den horretan, 28.600 euro irabazten dituzte. Garbi laga nahi dugu soldata arrakalari buruz mintzatzen garenean, halako adibideetaz ari garela, bulegoak garbitzen dituen emakume batek kalea garbitzen duen gizon batek baino %47 gutxiago kobratzen duela. Hitzarmenaren araberakoa da, baina %47ko aldea handia da”.
Gizon eta emakumeen arteko soldata desberdintasuna arazo politiko larria da. Oinarrian sistema kapitalista eta heteropatriarkalaren antolakuntza bera eta lanen banaketa injustua daude.
Argi laga nahi izan zuten beraien borroka udalez udal egingo dutela, lan baldintza eta soldata duinak eduki arte. “Antolakuntza eta borroka sindikalaren bitartez eskualdeko udalen batean 22.203 euroko soldata lortu dugu”. Soldata arrakalez gain, lan hitzarmen batzuen barruan kristalezko sabaiak ere aurkitu daitezkeela salatu dute, diru gehiago irabazten diren lanpostuak gizonentzat eta gutxiago irabazten dena emakumeentzat. “Gizon eta emakumeen arteko soldata desberdintasuna arazo politiko larria da. Oinarrian sistema kapitalista eta heteropatriarkalaren antolakuntza bera eta lanen banaketa injustua daude”.
Arazo horri irtenbidea bilatzeko, hiru gako eman dituzte garbitzaileek: “Alde batetik, kalitatezko enpleguaren aldeko politika publikoak sustatzea emakumeek jasaten dituzten prekarietate egoerei aurre egiteko, beste alde batetik, administrazio publikoak pribatizatutako zerbitzuetan edo berak bultzatzen dituen azpikontratetan behar dena baino soldata txikiagorik ez ordaintzea, eta azkenik, soldata igoerak egitea, feminizatutako sektoreetan balio berbera duten lanak berdin ordainduta egon daitezen”.
Sistemari planto. Gogora ekarri dute egungo sistemari planto egiteko arrazoi ugari daudela, eta “emakumeon antolakuntza eta borroka ezinbestekoak izango direla lan eta bizi baldintza duinen alde egin eta soldata arrakala gainditzeko”. Bizkaiko erresidentzietako emakumeak hartu dituzte eredutzat, “egunero borrokan aritu diren emakumeak”.
Sistemari planto egin eta biharko egunean kalera ateratzeko zenbait arrazoi zerrendatu dituzte: “Emakumeok sistemari planto egingo diogu gutxiago kobratzen dugulako, sexu jazarpena gure lantokietan ere jasaten dugulako, gure lanei balio gutxiago ematen diotelako, prekarietatean bizi garelako, pobreagoak garelako, indarkeria matxistak hil egiten gaituelako, gure gorputzen eta bizitzen jabe izan eta beldurrik barik bizi nahi dugulako!”.
Hartara, bizitza erdigunean jarriko duen gizarte justuago baten alde kalera aterako dira bihar. “Egun historikoa izango da, sindikalismo eraldatzailea ezinbestean feminista izan behar dela aldarrikatuko dugulako”.
Amaitzeko, esan dute emakumeek esparru produktiboan eta erreproduktiboan egiten duten ekarpenik barik munduak ez lukeela funtzionatuko, eta sistema kapitalista, arrazista eta heteropatriarkalean emakumeen diskriminazioa egiturazkoa denez, sistema bera dela auzitan jarri eta irauli behar dena. “Ez dago klase borrokarik emakumeen askapenik barik”.
Euskal Herriko Bilgune Feminista, Martxoaren 8an planto egiteko deia egiten. Argazkia: Bilgune Feminista
