Alzheimerrari eta dementziari buruzko formazio saioak egingo dituzte Ondarroan
Afagi Alzheimer Gipuzkoa elkarteak antolatuta eta El Futuro es la Memoria elkarteak eta La Caixa ekimenak babestuta, eta Lea-Artibai Amankomunazgoak lagunduta, Alzheimerra eta dementzietan formatzeko zaintzaileentzako saioak egingo dira Ondarroan. Ondarroa, Deba, Eibar, Elgoibar eta Mutrikuko Udalak ere lagundu dute ekimenean.
Saioak, oro har, menpeko egoeran dauden pertsonak zaintzen dituzten herritarrei zuzenduta badaude ere, herritar guztiei parte hartzeko gonbidapena luzatu dute Amankomunazgotik. Asteburuan egin dira lehen saioak, eta formazio hasi bada ere, oraindik izena emateko aukera dagoela jakinarazi dute. “Hainbat herritarrek soilik saio batzuetara joateko asmoa adierazi dute, eta hori egin nahi duenarentzat arazorik ez dela egongo adierazi nahi du Amankomunazgoak, beti ere lekua geratzen bada oraindik”.
Hurrengo saioak, berriz, barikuan [maiatzak 11] eta zapatuan [maiatzak 12] egingo dira Ondarroako Antiguako Ama egoitzan. Barikuan, esaterako, Psikoestimulazioa eta terapia osagarriak hitzaldia egongo da Maria Victoria Lucero piskologoaren eskutik, 17:00etatik 19:00etara. Zapatuan, berriz, Zaintzaren antolaketa. Baliabide Sozioasistentzialak hitzaldia eskainiko dute Naroa Diaz eta Elena Egia gizarte langileek, 10:00etatik 12:00etara.
Ekainaren 2ra bitartean, bestalde, beste hainbat saio egingo dira Antiguako Ama egoitzan. Ordutegiari dagokionez, barikuetan egingo diren saioak 17:00etatik 19:00etara egingo dira, eta zapatuetakoak, berriz, 10:00etatik 12:00etara.
Gogorarazi dutenez, saio bakoitzean 40 pertsonentzako lekua dago, eta bertan parte hartzeko aurretik eman beharko da izena, honako eratara: Lea Artibai Amankomunazgoko Gizarte Zerbitzuetara deituta (94-616 90 78), ongizate@lea-artibai.org helbide elektronikora idatzita edota Afagira deituta 943-29 71 18 edo afagi@afagi.eus helbide elektronikora idatzita.
HURRENGO SAIOAK:
Aurreko astean Ondarroan egindako saioetako bat. Argazkia: Lea-Artibai Amankomunazgoa
- Maiatzak 18. Erabakiak hartzea: Alderdi legalak eta finantzarioak. Hizlaria: Arantza Bengoetxea abokatua.
- Maiatzak 19. Elikaduraren garrantzia eta osasun zaintzak gaixotasunaren fase desberdinetan. Hizlaria: Mikel Odriozola familia medikua.
- Maiatzak 25. Laguntza produktuak eta jarrera tratamendua. Hizlaria: Amaia Zelaia terapeuta okupazionala.
- Maiatzak 26. Erlaxazioa teknika desberdinak zaintzaileentzat.
- Ekainak 1. Dolua: Gainditzeko teknikak. Hizlaria: Jesus Muñoz psikologoa.
- Ekainak 2. Zaintzaileen esperientzia, testigantza eta bizipenak mahaingurua. Moderatzailea: Koldo Aulestia.
