Kamiñazpiko jaiak, Ondarroan
Kamiñazpiko jaiak, ohi legez, horiz eta beltzez jantzita ospatuko dituzte barikuan [ekainak 1] hasi eta domeka [ekainak 3] goizaldera arte. Kamiñazpiko Jai batzordeak eta Ondarroako Udalak beti-betiko ekimenez betetako egitarau oparoa antolatu dute, eta bertara doanak mota guztietako ekintzaz gozatzeko aukera izango du. Auzotarrak direnak eta ez direnak jai giroan murgitzera gonbidatu dituzte antolatzaileek.
Ospakizunak jai batzordeko kideek Kamiñazpiko parketik botako duten bolanderagaz hasiko dira, eta hurrengo orduak musikaz beteta etorriko dira. Besteak beste, klasiko bihurtu den playback lehiaketa egingo da, eta beste behin ere, parkea jendez betetzea espero da. Zortzi bat taldek euren koreografia landuak erakusteko aukera izango dute.
Parkean geratzen direnek, bestalde, Azalera taldearen disko berriko kantuak entzun eta DJ Jotatxoren kantu dantzagarriekin gerriak astintzeko aukera izango dute.
Jaien azken txanpa berriz, pala txapelketagaz eta bizikleta ginkanaz hasiko dute. Txistulariek, bestalde, auzo oso goitik behera girotuko dute Aurrera beti, Ikusi mendizaleak, Agur Zuberoa, Elizondo… eta antzerako kantuekin.
Eguardian kuadrillek paellak nahi moduan prestatzen arituko dira bertsolariak adar joka dituzte bitartean. Eta arroz goxoak prestatu ostean, karpa azpian egingo dute bazkari herrikoian batuko dira. 300 lagunetik gora batuko dira Oihana Iguaran eta Aitor Mendiluze bertsolariek girotutako bazkarietan. Bazkalondoa ere eurek girotuko dute. Jai batzordeko kideek aurreratu dutenez, ostera, aurten ez da mus txapelketarik egingo.
Jaiak, ohi bezala, musikagaz girotuta agurtuko dituzte. Urtero, talde ezagunen batek jotzen du, eta aurten, Ze esatek taldearen txanda izango da. Hara talde ondarrutarragaz igoko dira parkeko oholtza gainera.
Kamiñazpiko playback lehiaketa, iaz
