Topa egiteko bildu dira Markina-Xemeingo Kontzekupean

Larraitz Ibaibarriaga Etxaburu

2018/06/16

Giro ederra ekarri du gaur [ekainak 16] Topabeer jaiak Markina-Xemeinera. 16:00ak aldera hasi dira herritarrak Kontzekupean biltzen, eta ez dute galdu aukerarik artisau garagardoak probatu eta gozatzeko horretarako prestatutako azokan.

Giro ederra izan dute Kontzekupean.

Jai batzordeko eta Markina Shots jaialdiaren antolatzaileek “balorazio positiboa” egin dute jendeak emandako erantzunagaz. “Aurreko egunetan ere egon da artisau garagardoak tabernetan dastatzeko aukera, eta jendeak hala egin du”. Pintxo pote egunean ere jendea artisau garagardoak edatera animatu zela gehitu dute. “Halako jaiak ekoizleentzat ere aukera ona dira beraien produktuak ezagutzera emateko. Ea jendearen artean ohitura zabaltzen den”. Topa eta topa artean, 20:00etan hasita, Moonshakers, Los Bracco eta Secreamers and Sinners taldeen doinuek hartu dituzte Kontzekupea eta inguruak. Zozketaren irabazlea. Jaiaren baitan, herriko merkatari elkartearen opariz betetako eskorga zozkatu dute. Irabazlea Felisa Larruskain Taniguchi izan da. Ibane Caballero Gonzalez umeak atera du zenbaki sariduna.