Mutrikuko Laranga auzoko bizilagunen eskaera kontuan hartzeko eskatu dute EH Bilduk eta Podemos-Ahal Duguk
Gipuzkoako Batzar Nagusietako EH Bilduk eta Podemos-Ahal Duguk salatu dutenez, EAJren eta PSEren arteko “gobernantza berriak” ez ditu orain arte GI-638ko lanetan kaltetuko diren Mutrikuko Laranga auzoko bizilagunak entzun. Auzotarrek egindako eskaerari, behintzat, ez diete erantzun. Hori dela eta, EH Bilduk eta Podemos-Ahal Duguk agerraldia egin dute gaur [ekainak 19] Batzar Nagusietan; Larangako auzotarren eskaria onartzeko, eta auzotarrek batzordean parte hartzeko aukera izan dezaten eskatu dute.
Mutriku eta Deba arteko GI-638 errepidea hobetzeko lanak dirauten bitartean bidea itxita egongo da, eta Galbaixo ermita ondotik sartu beharko dute auzora. Horrek, hain zuzen ere, Larangako bizilagun eta bertako erabiltzaileak egoera prekarioan dauden errepideetatik hamarnaka kilometroko itzulia egitera behartuko ditu.
1- Bideoa (Errepide nagusia itxita dagoen bitartean Larangakoek erabili beharko duten bidea):
Horren aurrean, Podemos-Ahal Duguk eta EH Bilduk kaltetutako bizilagunen agerraldia eskatu dute Azpiegituren batzordean, euren egoera eta eskaerak azaltzeko. “Gipuzkoako Foru Aldundiak guztion diruarekin hainbeste goratzen dituen gobernantza berria eta herritarren partaidetza badirudi herritarrei ez entzutean eta ez erantzutean datzala. Horixe ari da egiten Laranga auzoko 150 pertsonekin. Izan ere, Aldundiak GO-638 errepidera sarrera-irteerarik gabe utziko ditu bide hori hobetzeko lanek behar dituzten lauzpabost hilabeteetan”.
Juantxo Iturriak eta Xabier Olanok, Podemos-Ahal Dugu eta EH Bilduko batzar taldeetako ordezkariek, hurrenez hurren, “Aldundiaren proiektuek kaltetutako jendarte gipuzkoarrak aurkezten dizkien ezinegonen aurrean EAJk eta PSEk erakutsitako atentzio eza” salatu dute gaur [ekainak 19] egindako agerraldian; eurekin batera izan dira Larangako hainbat ordezkari ere.
Auzotarrek ere garbi utzi nahi zian dute ez daudela beharrezkotzat jotzen duten lan horien aurka, baina salatu dute obra hori nola gauzatu iritzia emateagatik, “aurrerapenaren aurka” egotea egotzi zaiela. “Ez inguruko bizilagunok, ez eskola umeek, ez bi jatetxeek, ez bertako hotelak eta ezta bertako landa-turismoak ez dute merezi Aldundiarengandik eta Mutrikuko Udalarengandik jasotzen ari diren mespretxua. Kezka eta eskaerak entzun beharrean, beste aldera begira ari dira”, adierazi dute batzarkideek.
2. Bideoa (Batzar Nagusietan hitz egindakoa):
Ezkerretik eskumara: Justo Pagola (Larangako auzotarra), Xabier Olano (EH Bildu), Iñaki Arin (Laranga), Juantxo Iturria (Podemos-Ahal Dugu) eta Luis Angel Alburquerque (Laranga). Argazkia: EH Bildu
Erlazionatutako edukiaMutriku eta Deba arteko errepideko lanek 14 hilabete iraungo dute
