Jagoba Arrasate berriatuarrak entrenatuko du Osasuna
Entrenatzaile berriatuarra urte baterako joango da talde gorritxora, eta mutilen lehen taldea zuzenduko du 2018-2019 denboraldian. Iruñeko taldeak eguaztenean [ekainak 20] jakitera eman zuen berria. Berriatuarra Club Deportivo Numanciatik dator, bertan zuen kontratua amaitu eta gero. Klub gorritxoak nabarmendu duenez, Arrasate “erronka berri bati aurre egiteko eta zaleen ilusio berria pizteko” kontratatu dute.
Osasuna Klub Atletikora, ez da bakarrik joango; Bittor Alkiza bere laguntzaileagaz eta Sergio Perez prestatzaile fisikoagaz joango da, eta talde gorritxoa Lehen mailara bueltatzea izango da euren erronka nagusia. Jagoba Arrasate Elustondo hurrengo egunetan aurkeztuko du talde nafarrak.
Osasunak Diego Martinezen kontratua eten ondoren kontratatu dute bizkaitarra. Arrasatek badaki zer den Osasuna, eta Braulio Vazquez gorritxoen kirol zuzendariak Numantziarekin harreman estua duenez, lehen eskuko informazioa jaso ahal izan du Arrasateren inguruan. Osasunari, orain, fitxaketekin hastea dagokio, eta baliteke Arrasate ez izatea Soriatik Iruñerako bidea egiten duen euskal herritar bakarra.
Arrasateren ibilbidea. Berriatukon hasi zuen entrenatzaile ibilbidea, Bigarren B mailako eta Hirugarren mailako zenbait taldetan jokatu ostean. Handik Elgoibar taldera joan zen, eta bertan Bigarren B mailako igoera kanporaketa jokatzeko aukera izan zuten bi urtez jarraian. Elgoibar taldean egindako lan onari esker, Realak gazteen taldea zuzentzeko deitu zion.
2012-2013 denborandian, berriz, Phillippe Montanier Realeko lehen taldeko entrenatzailearen laguntzaile izatera pasa zen, eta Montanierrekin batera Txapeldunen ligan jokatzeko aurreko kanporaketak jokatzeko sailkatu ziren. Entrenatzaile frantziarrak talde utzi ondoren, Arrasate lehen taldeko entrenatzaile bihurtu zen 2013an, eta denboraldi bikaina egin zuen. Olympique de Lyon kanporatu, eta europako txapelketako talde multzoetan sartu zuen taldea. Era berean, taldea Errege Kopako finalerdietara iritsi zen ere eta Ligan zazpigarren postua lortu zuen, Europa League jokatzeko sailkatuz. Hala ere, hurrengo denboraldia ez zen nahi bezain ondo hasi, eta kaleratu egin zuten.
Azkeneko hiru denboraldietan, Club Deportivo Numanciaren entrenatzailea izan da. Lehenengoan maila mantentzea lortu zuen eta bigarrenean, naiz eta gehiago sufritu, helburu berbera lortu zuen. Entrenatzaile bizkaitarrak talde ona osatu zuen, eta Lehen mailara igotzeko gertu egon da.
(Iturria: Berria)
Jagoba Arrasate. Argazkia: Numancia FC
