Zerbitzuen murrizketarik gabe onartu da Ondarroako aurrekontua
Ondarroako Udalaren 2018ko aurrekontua 10.129.133,08 eurokoa izango da; iazkoa baino ia 674.546,63 euro gehiagokoa. Aurreko eguenean [ekainak 28] onartu zuen udalbatzak aurrekontua, EH Bilduren zinegotzien aldeko botoekin (EAJ abstenitu egin zen).
Udalak nabarmendu duenez, aurten ez da zerbitzurik murriztuko. “Ondarroako udal batzordeak elkarlanean aritu dira, eta optimizazioa lortu da. Lan eta zerbitzuen bikoizketa saihestu, eta zerbitzurik murriztu gabe aurrekontua aurrera ateratzea lortu da”.
Udal ordezkariek gaineratu dutenez, azken hilabeteetan eragile eta herritarrekin batu dira, “iritziak jasotzeko eta aurrekontuak horren arabera moldatzeko”. Horregaz lotuta, esaterako, martxoan auzo batzarrak egin zituzten auzo guztietan.
Udalak derrigorrak ez diren baina eskaintzen dituen hainbat zerbitzu babestu nahi izan ditu modu horretara. Eta moldaketak moldaketa, murrizketarik ez dela egingo azpimarratu dute. “Azken hilabeteetan batzordeen beharrak batu dira; optimizaziora jo da; eta, ondorioz, ez da zerbitzuetan murrizketarik egin. Ekimen kopurua mantenduko da, beraz, udaleko batzordeen arteko elkarlan handiagoagaz”.
Argazkian, Herri Busa Ondarroako Alde Zaharra gurutzatzen (artxiboko irudia)
Kamiñalden egin beharreko inbertsioek udaleko arlo guztietan moldaketak egitera derrigortu dute udal gobernuaUdalak jasotakoaren arabera, honako zerbitzuak lehentasunezkoak dira herritarrentzat: Musika Eskola, Herri Busa, Etxelila, Gazte Lekua, Garapen Agentzia, kultur jarduerak eta Zaldupe kiroldegia. “Zerbitzuok herritarrei zenbakietan neurtzea zaila den onurak eskaintzen dizkiete. Kalitatezko bizitza eraikitzeko ezinbestekoak dira, eta horregatik zaindu egingo ditu udalak”. Era berean, Kamiñalden egin beharreko inbertsioek aurrekontua nabarmen baldintzatu dutela adierazi dute udal iturriek. “Kamiñaldeko 2.600.000 euroko inbertsioak udaleko arlo guztietan moldaketak egitera derrigortu dute udal gobernua, gutxi gorabehera %10a gutxitzea. Hala ere, udala pozik dago egindako lanagaz: urgentziazko beharrak asetzea eta oinarrizkoak mantentzea lortu egin da”. Inbertsiorik handienak, hirigintzan. Bestalde, herriaren hobekuntzarako 639.624 euroko inbertsioa egingo da. Bereziki, kaleak asfaltatu eta hobetu direla aurreratu dute. “Lehentasun osoa duten inbertsioak hartu dira kontuan, eta horrek hirigintzan izan du isla handiena (516.462 euro), herritarrek hala eskatuta”.
Mantentze lanei lotuta hainbat lan egingo dira herriko bide publikoen hobekuntzarakoHirigintza, eta bereziki bide publikoaren zolaketari dagokionean, honakoak dira aurreikusi diren lanak: Magdalena auzoan errepidean botatako galipota berritu egingo da datozen hilabeteetan (73.000 euro), Nasa kaleko lurra konpondu eta asfaltatu egingo da (62.179 euro), Zaldupe ikastetxeko jolastokiko lur zati bat (34.207 euro) eta bidezidorra konpondu egingo dira (7.000) eta Txorierrekan egiten ari diren etxebizitzen inguruko urbanizazio lanekin batera gas hobien instalazioa egingo da Txorierreka goraino (168.283 euro). Era berean, Kamiñazpin bigarren parte hartze prozesu bat egingo da (40.000 euro), irisgarritasun aldetik arazo ugari sortu baita urteetan izandako urbanizazio faltarengatik. “Prozesu horren ondorioz, bizilagunek erabakiko dute nolako auzoa nahi duten eraiki”. Mantentze lanei lotuta, gainera, beste hainbat lan egingo dira herriko bide publikoen hobekuntzarako. Besteak beste, Agustin Zubikarai plazaren urbanizazioa eta tela asfaltikoa jarriko da; “bizilagunen komunitateak proiektua aurkezten duenean, udalak berari dagokion partea egiteko konpromisoa hartu du”. Musika Plazako pareta konpondu egingo da, dauden filtrazioak kentzeko, eta, azkenik, Artibai egoitza aurreko plaza konpondu egingo da. [AURTENGO AURREKONTUA]
