Dena prest dago Mutrikuko Saturraran hondartzan Marea Urdina hasteko
Marea Urdina egitasmoa azken txanpara iritsi da. Ordu gutxi falta dira Autismoaren aldeko igeri zeharkaldi solidarioa Mutrikuko Saturraran hondartzan hasteko. Zeharkaldia, zehazki, zapatuan [uztailak 7] hasiko da, 08:00etan. Aritz Orbegozo Marea Urdinaren sustatzaileak adierazi duenez, zeharkaldia hasteko gogotsu eta prest daude.
Hamahiru etapatan banatuta, 34 itsas milia egingo dituzte igeri Gipuzkoako kostaldean zehar, eta lehengo bi etapak Mutrikutik igaroko dira; Saturraran-Mutriku (3,8 km) eta Mutriku-Deba (2,1 km), hain zuzen.
Saturraran eta Mutriku batzen dituen zatia egiten lehenak sei bat igerilari izango direla aurreratu dute antolatzaileek, eta nahi duenak horiek animatzera hurbiltzera gonbidatu dituzte. Are gehiago, Mutrikuko herritar batzuek Marea Urdineko taldearekin lehen metroak igeri egiteko aukera izango dutela nabarmendu dute. “Karraspio ontzian agertuko gara Saturraranera, eta hondartza aurrean uretara salto egin ostean, hondartzara iritsiko gara. Han lehenengo taldeko igerilariek hasiko dute zeharkaldiko lehenengo etapa. Gu beraiekin hasiko gara igerian. Sinbolikoki metro batzuk egingo ditugu Saturrarango haitzak pasatu arte, eta nahi duenak gurekin batera egin ahal izango ditu lehen metro horiek”.
Lehen etapa egingo duten igerilariek Marea Urdineko txano zuriekin egingo dute igeri, denek batera. Igerilariak laguntzen, gainera, piraguan, paddle gainean edo itsasontzietan hainbat jende joango da animatzen. “Gure ondoan joan nahi duen guztia ongietorria izango da”.
Taldearekin batera Karraspio ontzia joango da uneoro, eta eurekin batera beste txalupa laguntzaile bat joango da. “Txalupa horrek hurrengo taldeari zeharkaldia noiz datorren jakin araziko dio, prest egoteko. Herri bakoitzera gerturatzen garenean txirrina joko dugu”.
Aurreratu dutenez, lehen taldea 09:00ak inguruan iritsiko dira Mutrikuko moila parera, eta nahi duenak moilan ere animatu ahal izango ditu igerilariak. Lehen taldea buia arrosa bat eramango dute eurekin batera, eta hori izango da taldeek batak besteari emango dioten lekukoa.
Antolatzaileek eskerrak eman nahi izan diezkiete proiektuarekin bat egin duten guztiei. “Mutrikuko herriari ere eskerrak eman nahi diegu. Hasiera-hasieratik lagundu digute gauza askotan eta babes handia eman digute”.
Hondarribiara arte. Olatu urdinak ez du geldialdirik egingo eta Orioraino joango dira igerian zapatuan. Domekan [uztailak 8], berriz, Orio eta Hondarribia arteko tartea egingo dute. Marea Urdinakoek festara nahiz zeharkaldia ikustera eta igerilariak animatzera gonbidatu dituzte inguruko herritarrak. Horrez gain, zapatuan Orion eta domekan Hondarribian egingo diren festetara ere gonbidatu dituzte.
Orion, esaterako, Berdin-Berdinak kirol talde inklusiboko kideek musika jarri eta merienda eskainiko dute. Hondarribian, bestalde, festa potoloagoa egingo dute Passepartout eta Marea urdina taldeen kontzertu eta guzti.
Mutrikuarrak Marea Urdina egitasmoa babesten
Marea Urdina egitasmoaren aurkezpena. Argazkia: Marea Urdina
