Uztailaren 23a arte aurkeztu daitezke Ondarroako jaietako kartel lehiaketako lanak
Ondarroako Udalak 2018ko Andra Mari jaiak iragartzeko kartel lehiaketa abiarazi du. Irabazleak 500 euroko saria lortzeko aukera izango du, eta interesatuek uztailaren 23a orduko aurkeztu beharko dituzte beharrak udal erregistro orokorrean, 14:00ak baino lehenago.
Andra Mari jaietarako kartel lehiaketan edonork parte har dezake, eta gaia librea izango da. Udalak gogorarazi duenez, edozein teknika erabili ahal izango da. Behar guztiak A-3 neurrian aurkeztu beharko dira, euskarri gogorrean edo paperean. Era berean, egile bakoitzak lan bakarra aurkeztu ahalko du.
Lehiaketara aurkeztu beharreko kartelek honako testua izan beharko dute idatzita, nahitaez: 2018 Ondarroako jaiak, Andra Maixak (letra txikiagoan) eta Abuztuaren 11tik 18ra (letra txikiagoan).
Lanak udal erregistro orokorrean aurkeztu beharko dira, eta bestela postaz bidali udaletxera (Ondarroako Udala – 48.700 Ondarroa), Jaietako Kartel Lehiaketa gutunazalean idatzita. Lan guztiak gutunazal itxi batean aurkeztu beharko dira, eta beste gutunazal batean egilearen datu guztiak.
Saritua nor den Ondarroako Udalak izendatutako epaimahaiak aukeratuko du, baina lanek kalitate nahikorik edukiko ez balute, epaimahaikideek ez lukete saririk emango.
Iñaki Lersundi kultura zinegotzia, iazko kartel irabazleagaz. Argazkia: Ondarroako Udala
