Zuzendaritza talde berria eratzeko batzarra deitu du Ondarroa Arraun Elkarteak
Zortzi urteren ostean, Ondarroa Arraun Elkarteko zuzendaritza batzorde berria eratzeko garaia heldu dela jakitera eman dute gaur egun zuzendaritza batzordea osatzen duen taldeak. Azaldu dutenez, bi agintaldi bete ondoren “albo batera egiteko momentua heldu dela” uste dute. “Urte hauetan egindako lanak, izandako ardurak eta hartu beharreko erabakiek nekea pilatu dute guregan”.
Eta elkartea aurrera eramateko gogoberriturik dagoen jendea behar dela adierazi dute. “Honela bada, anima zaitez. Antolatu zure lagun edo arraunzale taldearekin eta kolpe zuzendaritzaren erronkari. Hala nahi izanez gero, zuzendaritza berriari laguntzeko prest izango gara lehen pausu hauetan, egunerokotasuneko martxa hartu arte”.
Senior mailako denboraldia iraila arte bukatzen ez bada ere, abuztuan jada datorren denboraldirako erabakiak hasi behar direla diote, eta horregatik bilera orokorra deitu dute. Batzarra zapatuan [uztailak 28] egingo da Kofradia Zaharrean. Lehenengo deialdia 11:00etan izango da, eta bigarrena, aldiz, 11:30ean. Zuzendaritza batzordeko hauteskundeak izango dira gai nagusia.
