Galbaixoen txinparta piztear da
Gaur hasi eta hilaren 23a arte hamaika ekimenez gozatzeko aukera egongo da Galbaixo jaietan. Herritarrentzako egunik bereziena biharkoa izango daUrtero bezala, uda agurtzera datoz galbaixoak. Gaur hasiko dira mutrikuarrentzat hain bereziak diren jaiak,...
Gaur hasi eta hilaren 23a arte hamaika ekimenez gozatzeko aukera egongo da Galbaixo jaietan. Herritarrentzako egunik bereziena biharkoa izango da
Urtero bezala, uda agurtzera datoz galbaixoak. Gaur hasiko dira mutrikuarrentzat hain bereziak diren jaiak, eta datozen egunetan, besteak beste, musikaz, herri kirolez, danborradaz, sokamuturraz, marmitako lehiaketaz edota kalejirez gozatzeko aukera egongo da.Hain zuzen ere, Anaiarte Biltokiak antolatutako danborradak emango die hasiera jaiei. Anaiartekoek adierazi dutenez, ekimenak 100 bat lagun batuko ditu danborrak eta kupelak jotzen kalez kale. Danbor jotzaileek Merkatu Plazatik irtengo dute 22:30ean, eta bi geldialdi nagusi egingo dituzte: lehena, Goiko Plazan, eta, azkena, Beheko Plazan. Martxa, Diana, Indiarena, Tatiago, Retreta eta Polka joko dituzte. Mutriku herria jotzen eta abesten amaituko da danborrada, eta, ondoren, danbor jotzaileak Merkatu Plazan batuko dira jan-edanean. Jai bezpera Laiotz taldearen erromerian gerriak astintzen agurtuko dute.
Bihar, berriz, jaietako egunik-eta handiena izango da: Galbaixo Eguna. Urteroko hitzorduari hutsik egin gabe, Galbaixoko ermitara eta inguruko zelaietara gerturatu, eta kuadrillan erromeria giroan ibiltzeko eguna izaten da biharkoa. Goizean hasita, orduro mezak emango dituzte 12:00ak arte. Goizeko elizkizunen ondoren, asko izango dira ermitara kandela piztera hurbilduko direnak ere.
Eguerdian, berriz, herri kirolen txanda izango da. Bertaratuko direnek kirol erakustaldi ederra ikusteko aukera izango dute Inhar Urruzuno eta Imanol Albizu Goikoetxe harrijasotzaileen eta Aratz eta Ugaitz Mugertza aizkolarien eskutik. Bazkal aurrea Ansorregi eta Larrañaga trikitilariek girotuko dute.
2,5 kilometro
14:30ak inguruan botako dute txapligua, eta mutrikuarrak urte osoan itxaroten egoten diren unerik zirraragarriena iritsiko da; goitibeheren jaitsiera. Hainbat kuadrillek prestaturiko tramankuluek Galbaixotik herrigunerainoko 2,5 kilometroko ibilbide bihurgunetsua egingo dute, bide bazterretan zain egongo diren jarraitzaileen gozamenerako. Azken goitibehera herriratu ondoren, jaiak herrigunean jarraituko du. 18:00etan, jaietako lehen sokamuturra egingo da, eta gaua musikarekin amaituko dute.
Etzi, aldiz, Galbaixo Txiki Eguna ospatuko dute. Mutrikuarrek sukaldean hasiko dute eguna, Txokor Eder elkarteak antolaturiko marmitako lehiaketan batuta. Lehiaketara aurkezten direnek hiru orduko tartea izango dute marmitakorik gozoena prestatzeko, eta epaimahaiak onena aukeratu eta gero, txapelketan parte hartu duten marmitakoen ohiko enkantea egingo da. Beheko Plazan batutakoek, hain zuzen ere, Piñastei Egunean bazkalduko dituzten marmitako lapikoak ahalik-eta preziorik onenean lortzen ahaleginduko dira.
Aurretik, berriz, Mutrikuko Musika Bandak galbaixoetako emanaldi berezia eskainiko du, Beheko Plazan. Galbaixo Txiki Eguna, gainera, txikienei zuzendutako eguna izaten da, eta nahi duenak grafiti tailerrean edota pottoka eta zezen txikiekin olgetan ibiltzeko aukera izango du.
Domekan, Piñastei Egunean, jaiaren olatua moilara ailegatuko da. Arrantzale jatorren jaia izanik, mahonezko arropak soinean igaroko dute herritarrek, usadio zaharrei eutsita.
Auzotarrak protagonista
Erraldoien eta Buruhandien Konpartsaren eta musika bandaren kalejirarekin hasiko da eguna. Piñastei Eguneko txerria arrastaka eta bere txerritxoak hartuta moilara joango dira kalejiran, jai giroa herri osoan zabalduz. Kalejira portura iritsi orduko, Aizabia Elkartearen eskutik beti-betiko jolasetan parte hartzeko aukera ederra izango dute bertaratuek: lurrezko itsulapikoak apurtzea, uztaiak harrapatzea… eta bien bitartean, arkupearen bueltan prestaturiko sardina erre goxoak dastatu ahal izango dira.
Hurrengo orduetan bi sokamutur egingo dira portuan, eta ausartenek zezen aurrean ibiltzeko aukera edukiko dute. Nolanahi ere, moilara jaisten denak urteroko giro ederrean murgildu ahalko du.
Jaiei amaiera emateko, Galbaixotarren Eguna ospatuko dute irailaren 23an. Galbaixon bizi diren auzotarrentzako egun berezia izaten da, izan ere, bertan batzen dira bertako hiru auzoetakoak, giro ederrean. Eguna mezarekin hasiko dute, eta, ohi bezala, auzotarrak elkarren aurka neurtuko dituzte indarrak herri kiroletan, ondoren auzo bazkaritan batzeko. Jaietako azken egunak beste hainbat osagarri ere izango ditu.
