Erromeria giro apartarekin hasi dituzte Mutrikuko Galbaixo jaiak

2018/09/14

Giro apartean hasi dituzte mutrikuarrek galbaixoak. Gaurkoan [irailak 14] Galbaixo Eguna ospatu dute, eta, ohitura jarraituz, asko eta asko izan dira Galbaixo ermitaren inguruan egin den erromeriarekin gozatzera bertaratu direnak. Eguraldi ona eta asteburua gainean dagoela-eta aitzakia hartuta, giroa pil-pilean egon da Galbaixo gainean eguerdirako. Ohitura den modura, dozenaka kuadrilla edota familia hamaiketako hartuta igo dira, eta eguerdira arte jan-edanean ibili dira ermita inguratzen duten zelaietan.

Kuadrilla bat Galbaixo Eguna ospatzen

Eguerdian, berriz, herri kirol erakustaldia egin da. Alde batetik, Ugaitz Mugertza eta Arkaitz Jauregi nor baino nor ibili dira aizkoran, eta bestetik, Inhar Urruzuno eta Imanol Albizu Goikoetxe harrijasotzen aritu dira plazan batu diren guztien gozamenerako. 14:30ean, ordea, goitibeheren hasieran ematen duen txapligua bota ondoren, goitibeherak Mutriku aldera jaisten hasi dira banan-banan. Bide hori egiten lehenak Tranpan behera inertzia taldeko mutrikuarrak izan dira sirena hots eta guzti. Ekintzan parte hartu dutenek gaurkoan ez dute izenik eman beharrik eduki, baina antolaketa lanetan ibili direnek 80 bat goitibehera inguru izango zirela azaldu dute.

[zuzenean ARGAZKI GALERIA IKUSI]

Askotariko tramankuluak ikusi dira Galbaixo gainetik herrigunerako 2,5 kilometroak egiten, drive-ak, errodamendudun goitibehera txikiak… Kuadrilla bakoitzak jaisteko bere ordua izan du, eta, beti modura, Potronor kuadrillakoak izan dira Goiko Plazara iristen azkenak; 17:00ak puntuan ailegatu dira ikurrina astintzen. Bi istripu. Gaurko jaitsiera ere nahikoa gorabeheratsua izan da. Bi istrupu egon dira, eta, hori dela eta, denbora luzez bidea itxita egon da anbulantziek min hartu dutenak artatzeko. Lehenengo istripua Entzus parean gertatu da. Goitibehera bat bidetik atera da, eta barrukoek kolpe handia hartu dute. Zauri larririk ezean, euren kabuz ailegatu dira plazara.

[zuzenean ARGAZKI GALERIA IKUSI]

Bigarren istripua, aldiz, larriagoa izan da. Galbaixo gainetik irten, eta handik gutxira istripua izan du beste kuadrilla batek, gurutzearen inguruan. Goitibehera blokeatu egin da, eta ibilgailua buruzgain geratu dela argitu dute bertan zeudenek. Ondorioz, barruan zeudenak bata bestearen gainean pilatuta geratu dira. Hiru nahikoa larri zauritu dira, eta anbulantzian Mendaroko ospitalera eraman dituzte.