Bitor Arizmendi artista mutrikuarra zendu da
Bitor Arizmendi Aranberria mutrikuarra eguenean [urriak 4] hil zen, 97 urterekin. Bere aldeko hileta elizkizunak barikuan [urriak 5] egin ziren Mutrikuko Jasokundeko Andra Mariaren elizan.
1921eko abuztuaren 19an jaio zen Mutrikun eta bere bizi osoan artearekin eta kulturarekin lotura zuzena izan zuen Arizmendik. Musikagintzan aritu zen, esaterako, herriko musika bandan ere aritu zen txikitatik eta baita ere koruan. 7 urterekin hasi zen, eta 80 urtetik gora egin zituen abesbatzan kantari.
Artearekiko zaletasunak bultzaturik Mutrikuko Artezale eskolako irakaslea eta bultzatzailea izan zen. Anizeto Urangarekin eta Xiri Andonegirekin batera 1987-1988 ikasturtean ekin zioten arte eskolari. 30 urtetik gora egin zituen pintura irakasle modura, eta bere ikasle izandakoek oroitzapen oso onak gordetzen dituzte. “Sekulakoa zen pertsona eta irakasle modura. Oso atsegina eta adeitsua zen ikasleekin”.
Bere ekarpen artistikoari dagokionez, 200 koadrotik gora margotu zituen, eta horietako asko herrian bertan badaude ere, Euskal Herriko beste hainbat txokotan ere zabalduta daude. Hainbat pintura lehiaketan ere sariak irabazi zituen, eta erakusketa askotan hartu zuen parte.
Bere bizia kultur jardunari loturik egon bazen ere, beste hainbat eginbidetan ere aritu zen. Guraize fabrikan lan egin zuen erretiratu arte. Margolaria izateaz gain, kirolari profesionala ere izan zen. Beste hainbat mutrikuar bezala puntista profesionala izan zen. Atzelariak Vigon (Galizia) debutatu zuen 1940ean. Garaian garaiko frontoirik ezagunenetan jokatzeko aukera ere eduki zuen; Valentzian, Palman, Madrilen, Zaragozan eta Bartzelonan besteak beste. Eta atzerrira pausoa emateko zegoenean, bere kirol ibilbidea eten behar izan zuen, lesio bat tarteko .
Bitor Arizmendi duela hiru urteko omenaldian
