Arimen Gaua ospatuko dute, estreinako, Ondarroan
Arimen Gaua gure arbasoen ohitura paganoa berreskuratu nahirik, hainbat ekintza antolatu dituzte urriaren 31n Txomin Agirre ikastolako Iparra Guraso Elkarteak eta Zubi Zahar herri ikastolak, bakoitzak bere aldetik. Iparra Guraso Elkarteko kideek, esaterako, kalejira, jaialdia eta txokolate jana antolatu dituzte, Zubi Zaharrek, ostera, jaia egingo du Ibaiondon.
Halloween delako jaia mundu osoan zehar ezaguna baldin bada ere, Arimen Gaua ospatzeko ohitura ondo errotutako tradizioa izan da Euskal Herrian. Gaur egun ohitura galdu bada ere, 1950eko hamarkadara arte Euskal Herriko herri eta eskualde gehienetan bizirik iraun zuen ohitura izan zen. Garai bateko sustraietara buelta egiteko proposamena luzatu dute bi ikastolek. “Beti pentsatu izan dugu iparameriketatik datorren ohitura dela, baina gaiari buruz dokumentatzen hasi garenean, jaiaren jatorria Europa dagoela, eta berton ere ospatzen zela ohartu gara”, adierazi dute Iparra Guraso Elkartekoek.
Herritarrak mozorrotzera gonbidatu dituzte bi ikastolek. “Etorri mozorrotuta, etxeko izara, trapu zein arropa zaharrak jantzita, linterna eskuetan duzuelarik dantza, kantu zein saltoka ondo pasatzera”, gaineratu dute Iparra Guraso Elkartekoek.
Txomin Agirre ikastola aurretik irtenda mozorrotutako kalejira egingo dute, Musika Eskolako trikitilariak eta Artelango erraldoiak ere lagun izango dituzte. Kalejira zabaltzen karroza bat joango dela aurreratu dute Iparra Guraso Elkartekoek, eta bertan Arimen Gauagaz lotura duten pertsonaiak joango dira. Kalejiran Zaldupe Eskola Publikoaren jolastokira joango dira, eta tartean geldialdiren bat edo beste egingo dituzte, hainbat ezustegaz.
Kalez kale ibili ostean, eguraldi txarra iragarrita dagoenez, Itsasaurren egin beharreko ekintzak Zaldupe Eskola Publikoaren jolastokian egingo dira. Horretan musika, dantza, andrabanda, oihal ikuskizuna… egingo dituzte. “Gure herriko haur zein nagusi, guztiok, jai honetan parte hartzera gonbidatzen zaituztegu. Jaia ikastolako guraso elkarteak antolatu badu ere, herri mailako beste hainbat taldek ere gonbidatu ditugu parte hartzera. Musika Eskolak, Andrabandak, Artakak, Artelanek eta Kaia 1 dantza taldeak parte hartuko dute”.
Iparra Guraso Elkarteko kideak Arimen Gaua jairako deialdia egiten
Ume eta gurasoak mozorroturik santa eskean joango dira etxerik etxe IbaiondonJaialdiagaz amaitzeko, txokolate jana egingo dute Zaldupe Eskola Publikoaren jolastokian, “gure arbasoen ohiturei jarraituz”. Txokolate janean batzen den borondatezko dirua, gainera, Ekairi buruzko film laburra egiten laguntzeko izango dela aurreratu dute. Zubi Zahar Herri Ikastolakoek bestelako proposamena dakarte Ibaiondora. Mozorrotuta, “inork ez ezagutzeko moduan” joateko deia egin dute 21:00etan Kamiñazpiko parkean jarri dute hitzordua, eta jaia ilunetan ospatzen zenez, 21:00etatik 22:00etara, kaleko argiak itzaliko dira. “Ilunetan kandela argi hutsak ikusiko dira, eta ume eta gurasoak mozorroturik santa eskean joango dira etxerik etxe”. Kaleak atontzeko, berriz, kalabazak eta arbiak behar dituztela nabarmendu dute. EGITARAUA:
- 18:00. Kalejira, Txomin Agirre ikastolatik irtenda (Iparra Guraso Elkartea).
- 19:00. Ikuskizuna Zaldupe Eskola Publikoaren jolastokian (Iparra Guraso Elkartea).
- Ondoren, txokolate jana, Zaldupe Eskola Publikoaren jolastokian(Iparra Guraso Elkartea).
- 21:00-22:30. Santa eskea, Ibaiondon (Zubi Zahar Herri Ikastola).
