Bazkide bila dabil Mutrikuko Musika Banda
Mutrikuko Musika Bandak aurtengoan ere bazkide egiteko aukera eskaini nahi die herriko musikazale guztiei. Beste urte batez musikarekin gozatzeko proposamena luzatu diete herritarrei. “Aurten ere goza ezazu musikaz. Egin zaitez Mutrikuko Musika Bandako bazkide”.
Herritarren artean musika zaletasuna bultzatzeko asmoarekin abiatu dute kanpaina, eta banda diruz laguntzen dutenek hainbat abantaila izango dituztela jakitera eman dute. 15 euroko urteko kuotaren truke, bandaren hiru kontzertu esanguratsuenetariko CDak jasoko ditu doan. Zehatz esanda, Udaberriko, Udako eta Santa Zeziliako kontzertu berezietan grabatutako hiru CDez osatutako sorta jasoko dituzte opari, “musikariek egiten duten lana ezagutzera emanaz”.
Urteko hiru kontzertu garrantzitsuenen kantu sorta jasotzeaz gain, Bilboko Euskalduna Jauregian edo Donostiako Kursaal Jauregian egingo den goi mailako kontzertu baterako bi sarrera eta hiri horretako jatetxeetako batean bi lagunentzako afaria zozkatuko dituzte bazkide egiten diren guztien artean. Zozketaren irabazlea azaroaren 24an emango duten Santa Zeziliako kontzertuan emango dute jakitera. “Kontzertuan bertan egingo dugu zozketa”. Hori bai, zozketan parte hartu ahal izateko Santa Zeziliko kontzertua aurretik komeni da bazkide egitea.
Bestelakoan, bazkide kanpaina urte bukaera arte zabalik dagoela nabarmendu dute. Bazkide egin nahi dutenek bandako kideekin harremanetan ipini edo kontzertu batetara bertaratu besterik ez dute izango. Aldi berean, helbideratu daitekeen banku transferentzia bat ere egin ahal izango da Kutxanbankeko ES64 2095 5089 54 1063990070 kontu zenbakira.
Momentu honetan 80 bazkide ditu bandak, baina gehiago batu nahi dituztela jakitera eman dute. “Bazkide kanpaina herritarrak musikara gerturatzeko eta horiek musikarekiko lotura handitzeko modu bat dela iruditzen zaigu”.
Mutrikuko Musika Bandako musikariak Zabiel plazan elkartuta. Argazkia: Mutrikuko Musika Banda
