Lehenengo Arimen Gaua jai giro ederrean ospatu dute Ondarroan

2018/11/01

Ondarroako Arimen Gaueko ekimenek jende asko batu zuten atzo [urriak 31]. Lehendabizi, kalejira eta ikuskizuna egin zituzten Txomin Agirre ikastolako Iparra Guraso Elkartearen eskutik. Eguraldi txarra zegoenez iragarrita, kalejira zer edo zer beranduago hasi zen, eta Itsasaurren amaitu beharrean Zaldupe ikastolako jolastokian amaitu. Herritar askorek bat egin zuten Iparra Guraso Elkarteak egindako proposamenagaz. Besteak beste, jende asko batu zen Ibaiondotik irten zuen mozorrotutako kalejiran Txomin, Agi, Tola eta Txorimaloa pertsonaiak kamioan aurretik zituztela. Kalejira, gainera, ilunetan egin zuten, argi koloretsuekin lagunduta. Zaldupeko aterpera ailegatu zirenean, berriz, beste hainbeste herritar zain zituzten ongietorria ematen.

[zuzenean ARGAZKI GALERIA IKUSI]

Dantza emanaldiak, oihal erakustaldia eta Andrabandaren danbor hotsa amaitu ostean, eta hainbat herritar txokolate janean batu ziren. “Txokolate asko banatu genuen. 300 edalontzi ekarri genituen, baina horrek nahikoa arin amaitu ziren, eta gehiagoren bila joan behar izan genuen”. Txokolatea eta bizkotxoa hartu zuten herritarrek borondatea emateko aukera eduki zuten. Dirua, gainera, Ekairi buruzko film laburra egiten laguntzen bideratuko da. Nahikoa diru batu zen, eta Ekairen gurasoek herritarrak zoriondu nahi izan dituzte.

Gaztetxoak Santa Eskean, Ibaiondon

Iparra Guraso Elkarteko kideek nabarmendu dutenez, datorren urtera begira ere jaia antolatzen jarraitzeko asmoa dute. “Gogotsu gaude. Oso erantzun ona eduki zuen, eta herri guztiak bat eginda ondo pasa genuen”.

[zuzenean ARGAZKI GALERIA IKUSI]

Ibaiondon, bestalde, santa eskean ibili ziren. Zubi Zahar herri ikastolak egindako proposamenarekin hainbat herritarrek egin zuten bat. 21:00etan, kaleko argi guztiak itzali zituzten auzoan, eta ume zein gurasoak etxerik etxe ibili ziren eskean. Goxokiak, gailetak, txokolatea, intxaurrak… denetarik jaso zuten Xanduli, manduli, kikirriki.. eman goxokiak guri! esaterarekin batera. “Umeak oso pozik ibili ziren ilunetan parranda egiten. Ekimenak erantzun polita izan zuen, eta errepikatzeko asmoa dugu”.

Erlazionatutako edukiaARGAZKI GALERIA: Ondarroako I. Arimen Gaua