Zunbeltz Bedialauneta izango da EH Bilduren Ondarroako alkategaia
Ondarroako EH Bilduren koordinazio mahaiaren eta oinarri sozialaren babesagaz, Zunbeltz Bedialauneta Ibaibarriaga izango da EH Bilduren alkategaia 2019ko maiatzeko udal hauteskundeetan. “Ondarroan urte gogor hauetan egindako lana sendotzeko erronka izango du datorren agintaldian”.
Agintaldi zaila egokitu zaio Bedialaunetari, eta egoera zailenean ere aurrera egiteko gai izan da udal taldea. Besteak beste, alkate makila hartu eta biharamunean, eta Kamin?aldeko mendi magalaren erorketaren ondorioz, 179 familia euren etxebizitzetatik aterarazi behar izan baitzituzten. “Hiru urte hauetan asko ikasi dugu, administrazioaren kudeaketa, herritarren arazoak zuzenean bideratu… nekea ere handia izan da, baina herrigintza horrelakoa izaten da, ezina ekinez egina”.
Alkateak adierazi duenez, aurrera begirako erronkak ere ez dira izango txikiak. “Herritarren parte hartzea bultzatzea, politika sozialak indartzea eta auzoak hobetzea, pausoak ematen jarraituko dugu Ondarroa solidarioagoa, parte hartzaileagoa, euskaldunagoa eta biziagoa izateko”.
Zunbeltz Bedialauneta. Argazkia: EH Bildu
Zunbeltz Bedialauneta Ibaibarriaga (1974an Ondarroan jaioa) igeltseritza ikasketak egin zituen. Udalburu izan aurretik fundizioko operarioa izan zen. Gaztarotik herrigintzan ibili izan da; intsumisoa, ekologista, Kresala Kultur Elkarteko partaidea, Radixu Irratian ibilitakoa… 2015ean ingurumen zinegotzi izendatu zuten.
Zinegotziak, martxoan. Hauteskunde zerrenda osatuko duten pertsonak proposatzeko eta izendatzeko prozesu parte hartzailea, berriz, 2019ko martxoan egingo dutela jakitera eman dute. “Alkategaia aukeratzeko egin den moduan, bigarren fase horretan parte hartzeko ere ezinbestekoa izango da EH Bilduren barneko erroldan izena ematea. Behin barneko aplikazioan izena emanda, hauteskunde guztietarako zerrendak osatzeko prozesuetan parte hartzeko aukera izango dute izena emandakoek, baita EH Bilduren informazioa nahieran kontsultatzeko aukera ere”.
