Portu zuzendaritza hobekuntzak egiten ari da Ondarroako Astilleru inguruetan
Eusko Jaurlaritzako Portu eta Itsas Gaietako zuzendaritza hainbat hobekuntza egiten ari da Ondarroako Astilleru inguruetan, Ondarroako Udalaren eskariz.
Zunbeltz Bedialauneta Ibaibarriaga Ondarroako alkateak azaldu duenez, lanak egiten ari diren eremua portu eta itsas gaietako sailaren konpetentzia da gaur gaurkoz, eta aste gutxi batzuk barru ezagutara emango duten hitzarmena sinatzeko baldintzetako bat dira egiten ari diren lanak. “Gune horietako mantenua eta gastuetako asko udalak bere gain hartzen ditu, eta portu zuzendaritzari galdetu genion ea zelan den posible mantenu gastu guztiak guk gure gain hartzea, eta gero zergak ordainaraztea”.
Erakunde baten eta bestearen konpetentziak zehazteko, beraz, hitzarmen bat sinatuko dute bi aldeek, baina berau sinatu aldetik Ondarroako Udalak bi eskari egin dizkio portu zuzendaritzari. Alde batetik, Astilleru inguruko gunea atontzeko eskatu dute, irisgarritasuna eta segurtasuna hobetzeko.
Besteak beste, Zaldubidetik datorren pasealekua “jarraipen barik” dagoela iritzita, behegainea maila berean jartzeko eskatu dute, orain dagoen espaloia desagertaraziz. Hobetze lanak aurreko astean hasi zituzten, eta lanak bi bat hilabatetetan amaituko dituztela esan diete udal ordezkariei.
Oraingoz, kukaña inguruan zegoen baranda kendu eta petrila eraikitzen ari dira. “Portu zuzendaritzak petrila ipintzea erabaki du. Enbata egoten denean gune horretara ura sartzen da, eta berau babesteko ipiniko dute”. Gunean egiten ari diren lanak aprobetxatuta, gainera, kukaña ere aldatu egin dutela aurreratu du Bedialaunetak.
Aldi berean, Arraun Elkartearen aurreko gunea ere konpontzeko eskatu du udalak. “Behegainea ere ez dago egoki, eta hori ere konpontzeko eskatu genuen”. Tarte horretan, gainera, barandak ipiniko dituzte pantalan parean segurtasuna gehitzeko. Gaur [azaroak 20] hasi dira gune horretako lanak, eta oraingoz, Erretoki aurreko gunea oinezkoei irekita badago ere, Arraun Elkarteko parea guztiz itxita dago. Bertatik igaro behar duten oinezkoek goitik igaro beharko dute, gunea ireki arte.
Azkenik, Itsasaurren argiztapena berrizteko eskatu du udalak, herritarren eskariz. “Egunotan parke inguruan hamar led farola ipini dituzte, eta argitasun gehiago dagoela igartzen da. Orain fatxada batzuetan beste argi puntu batzuk ipintzea falta da. Gabonetarako Itsasaurreko ingurua hobeto argiztatua egongo delka aurreikusten dugu”.
Arraun elkartearen parean behin-behineko barandak ipintzen
Astillerun petrila ipintzen
