65 bat lagun batuko dira Gizaburuagako Santa Katalina eguneko bazkaritan

2018/11/21

Santa Katalina eguna goi-goitik ospatuko dute domekan [azaroak 25] Gizaburuagan. Olazar kultur elkarteak antolatuta, hainbat ekimen egingo dituzte. Herritarrek beti-betiko ohiturei eutsiko diete aurten ere. Udalak zein kultur elkarteak herritar guztiak ospakizunetan parte hartzera gonbidatu dituzte. Ohi modura, herri bazkaria egingo dute. Agertu dutenez, 65 bat lagun (15 ume eta 50 nagusi) batuko dira Herriko Tabernan egingo duten bazkaritan. “Lehenengo umeen txanda izango da, eta ondoren, nagusiak jarriko gara mahaian”.

Gizaburuagako Santa Katalina eguneko bazkaria

Bazkariagaz gain, beste hainbat ekimen prestatu dituzte kultur elkarteko kideek. Besteak beste, XI. Barraskilo lasterketa egingo dute frontoian. Herriko gazteenak txapelketan parte hartzeko barraskiloak batzen hasita daude. Antolatzaileek iragarri dutenez, parte hartzaile guztientzako egongo dira opariak. Frontoiko lurrean propio margotutako ibilbidea azkarren burutzen duen barraskilorik arinenak irabaziko du lasterketa. Haren jabeak opari berezia irabazteko aukera izango badu ere, beste parte hartzaile guztiek ere oparia jasoko dutela gogorarazi dute. Barraskilo lasterketa amaitu ostean, trikitilariek lagunduta kalejira egiteko aukera izango dute herritarrek, harik-eta bazkaltzeko ordua iritsi arte. Bazkalosteko orduak udal aretoan egingo den ludotekan jolasean igaroko dituzte txikienek. Helduak, berriz, bingoan jolasean ibiliko dira. Eguna amaitzeko, ezustekoren bat edo beste egongo dela aurreratu dute. EGITARAUA:

11:00. Meza Santa Katalina elizan.
12:00. XI. Barraskilo lasterketa eta Joseba eta Mikel trikitilariak.
14:00. Umeen herri bazkaria.
15:00-19:00. Umeentzako ludoteka.
15:00. Nagusien herri bazkaria.
Jarraian, Bingoa.
19:00. Ezustekoz betetako ikuskizun berezia.