Euskal kultura paganoari so
Bullets of Misery talde gernikarrak 'Linguae vasconum primitiae' laugarren diskoa kaleratu du, eta bihar estreinatuko du Astrako Metal Fabrika jaian. Euskal kultura paganoa du ardatz bost abestiz osatutako lanak.Linguae vasconum primitiae laugarren dis...
Bullets of Misery talde gernikarrak ‘Linguae vasconum primitiae’ laugarren diskoa kaleratu du, eta bihar estreinatuko du Astrako Metal Fabrika jaian. Euskal kultura paganoa du ardatz bost abestiz osatutako lanak.
Linguae vasconum primitiae laugarren diskoa dakar esku artean Bullets of Misery musika talde gernikarrak. Eta bihar Metal Fabrika jaialdian egingo dute bost abestiz osatutako azken lanaren aurkezpena.Musika estiloari fidel jarraitzen diote oraingoan ere. Hala, musika «zuzena eta gogorra» da diskoan aurki daitekeena: Death metala, alegia. «Aurreko diskoan egin modura, estilo gogorra landu dugu. Entzuleak ez du melodiarik aurkituko; bai, baina, asko landutako kantu teknikoak». Orain dela hamar urte talde modura hasi zirenean metal modernoa lantzen zuten, baina denboragaz «estilo propioa» lortu dutela diote.
Beraien artean «oso desberdinak» diren bost abesti landu dituzte oraingoan: Ilunak eta gogorrak. «Death metalaren barruan oso desberdinak diren bost kantu ilun dira».
Kritika
Atmosfera berean kokatuta, letrak ere «ilunak» direla diote Bullets of Miseryko taldekideek. Soinuagaz bakarrik ez, letrekin ere transmititu egin gura dute.
Orain arte, eliza eta manipulazioa kritikatu dituzte. Oraingoan, baina, euskal kultura paganoa da Linguae vasconum primitiae lanaren ardatza: «Euskal kultura paganoan zentratu gara; erlijio gabeko kultura horretan. Euskal Herrian eta inguruetan egon zen kultura salatu dugu, eta horrek erlijioagaz lotura zuzena eduki ez arren, erlijioa bere horretan ez dena kritikatu dugu».
Lan berri horren grabazioa eta ekoizpena denbora «luzean» egin dutela onartu dute, prozesu luze baten emaitza dela: «Sortzerako orduan, armonian eta koherentzi musikalean zentratu gara. Grabatzerakoan, berriz, alor teknikoan. Eta zuzenekoak lantzerakoan, aldiz, mugimenduetan». Prozesua lasaitasunez hartu dute, «etapa bakoitza ondo landuz».
Urte eta erdi geldi egon eta gero, sortutako bost kantuak kalean eduki nahi izan dituzte: «Sortutako abestiak zuzenean kaleratzen ditugu».
Diskoa eskuratu nahi duenak taldearen bitartez lor dezakeela zehaztu dute Bullets of Miseryko kideek. Euren kontura ekoiztutako lana denez, diskoaren zabalkundea ere euren eskuetan geratzea erabaki dute. «Hainbat diskoetxe begiratu genituen, baina gurea guk ekoiztea erabaki genuen azkenean».
Estreinaldia, Astran
Etxean eta Metal Fabrika jaialdian estreinatuko dute lana, eta martxan jartzeko gogotsu daude: «Metal Fabrikan azken lanaren lehen kontzertua ematea oso pozgarria da, berezia guretzat. Beti estreinatu ditugu lanak Gernika-Lumon; hala ere, aurtengoa berezia da».
Kontzertuak emateko ilusioa dute, eta dagoeneko badituzte datak zehaztuta. Hala ere, horiek apurka-apurka ezagutaraziko dituzte, «jendearen misterio eta gogoa mantentzeko».
