180 bat herritar batu ditu Berriatuko V. Erroak Loran jaialdiak

2018/11/24

Berriatuarrek herriarentzat prestaturiko jaia ospatu dute gaur [azaroak 24] bosgarrenez: Erroak Loran. Goikolau Kultur Elkarteak bultzatutako jai egunak herritar nortasuna festa giroan aldarrikatzea du helburu, eta aurtengoan ere helburu horri eutsi diote. Nabarmendu dutenez, “denen artean egindako jaia” izan da gaurkoa. Beste behin ere, ekintza guztietan herritarrak bihurtu dira protagonista, baita janaria prestatu eta bazkaria zerbitzatzerakoan ere. 180 herritar inguru batu dira bazkaritan jaiko zapi urdian soinean. Horiei bazkaria zerbitzatzen 25 bat herritar aritu dira, eta bazkaria prestatzen berriz, beste hamar bat. Mendibarren frontoiko bazkari herrikoian batu direnek bertoko produktuekin egindako menua izan dute aukera. Helduek indar jana egin dute sakramentu eta guzti. Gazteenek berriz, paella dastatzeko aukera izan dute.

Bazkaria zerbitzatzen ibili den herritar taldea

Jaia, baina, eguerdi aurretik hasi dira girotzen. Tarine musika eskolako Trikipand taldeko kideek kalejira egin dute herrian zehar. Atzetik, Saratz dantza taldekoek dantza ikuskizun ederra eskaini dute herritarren gozamenerako. Eta bazkaltzen jarri aurretik, Berriatuko eliz abesbatzak hainbat kantu eskaini ditu frontoi barruan.

[zuzenean ARGAZKI GALERIA IKUSI]

Kofradeen lana goraipatuz. Jai usaina, baina, atzo [azaroak 23] hasi zen zabaltzen. Goikolau kultur elkarteak Goikolau Sariak banatzeko ekitaldia egin zuen. Kultur elkarteak, aurten, kofradeak omendu nahi izan ditu “gainbehera eta erdi amaitzen dagoen” ohitura bat delako. Atzo, gainera, kofradei buruzko berbaldia eman zuen Abel Ariznabarretak bideo gelan. Nabarmendu zuenez, XII. mendean gauzarik garrantzitsuena ziren kofradeak. “Auzoak antolatzeko era bat ziren. Eta gero etorri ziren herriak, aldundiak…”. Ondoren, Kanpai deiak dokumentala ikusteko aukera izan zuten bertaratuek. Aurtengo omenduekin lotuta, gainera, abenduaren 2ra arte auzoetako jai eta kanpai erakusketa egongo da Goikolau aretoan; barikuetan, 19:30etik 20:30era eta asteburuan, 12:30etik 13:30era.