Xisterako Nesken Nazioarteko Topaketa jokatuko dute Berriatuan
Zapatuan [abenduak 1] hasita jokatuko dute Nesken III. Nazioarteko Topaketa Berriatuko Mendibarren frontoian. Xisterako kluben ordezkaritzaz gain, Bartzelonako Vasconia, Pamiers eta Toulouse ere egongo dira ordezkatuta txapelketan. Antolatzaileek nabarmendu dutenez, gaur egun zesta-puntan dabiltzan ia neska guztiak batu eta elkarrekin jokatu ahal izango dute asteburuan.
Topaketaz gain, Xisterako nesken Zirkuitoko partidak ere jokatuko dituzte datozen egunotan Berriatuan. “Partida hauek garrantzitsuak izango dira, finalerdien aurretik jokatuko diren azkenak izango dira eta”.
Gaur [azaroak 29], 19:00etan hasita, Jauregiren eta Merinoren aurkako norgehiagoka jokatuko dute Aldazabalek eta Arbek. Zapatu [abenduak 1] topaketako goizeko ekitaldien tartean, Ortiz de Mendibilen eta Arriolaren aurka neurtuko dituzte indarrak Lorelinek eta Merinok. Domekan [abenduak 2] goizean, azkenik, Aldazabalen eta Calvoren aurka jokatuko dute Lorelinek eta Arriolak.
Zumaian eta Tolosan. Mutilen Xistera Ugarein Zirkuitua, aldiz, amaitzen ari da. Finalerdietan sartu nahi dutenek azkenengo aukerak izango dituzte Zumaian eta Tolosan. Sailkapen nagusian, gainera, gauzak oso estu daude.
Xisterako neska puntistak. Argazkia: Xistera
