Amaitu dute Gizaburuagako frontoia eraberritzeko lanen lehen fasea
Azken asteotan Gizaburuagako frontoia handitzeko eta eraberritzeko hainbat lan egin dituzte. Juan Migel Arostegi alkateak adierazi duenez, lanen lehenengo faseagaz amaitu dute. Hain zuzen ere, frontoiko aldagela eta ikusle palkoa eraitsi dituzte, frontoia luzatzeko. Aurreko astean amaitu zituzten lanak, eta eraisketa lanei esker, lauzpabost metro irabazi ditu frontoiak.
Arostegik agertu duenez, frontoiak zituen aldagelak ez zeuden oso egoera onean. “Frontoia mendia jotzen dago, eta hezetasunak asko kaltetu zituen aldagelak. Hormako azulejuetako asko erdi jausita zeuden. Ura berotzeko sistema ere oso zaharkitua zegoen. Gas butanozko galdera zegoen, eta behar zenean, ez zen erabilgarri egoten. Eta udaletxeko azpiko gimnasioan ere aldagelak baditugunez, behar izanez gero, hara bideratuko ditugu pilotariak”.
Aurrera begira, berriz, beste hainbat hobekuntza egin nahi dituzte frontoian, eta horretarako, lanak lehiaketara aterako dituzte datorren urteko lehen hiru hilabetean. Frontoia berrizteko hainbat lan egin behar direla kontuan hartuta, eta udalak duen aurrekontua ere mugatua dela jakinda, lanak bi edo hiru urtetan burututzeko asmoa agertu du udalak. “Horixe da gure plangintza. Lanak lehiaketara ateratzen ditugunean, lanak hiru bat ekitalditan burutu ahal izatea eskatuko dugu”.
Akuiola baserrira eta Amorotora doan auzobidea ere konpontzeko lanak hasita daude, eta laister amaituko dituzte. “Urtarrilaren 11ko euriteak bidea nabarmen kaltetu zuen, eta bidea konpondu eta egonkortu beharra egon da”.
Lariz auzoan dauden zaborren edukiontziak lekuz aldatzeko nahia agertu du udalak. “Aldundiak eta URA agentziak baimena noiz emango zain gaude”.
Nahitaez egin beharreko lana dela nabarmendu du alkateak. “Edukiontzientzako, egia esan, ez da leku egokia, eta ez dago behar besteko tokirik ere. Edukiontziak, gainera, errepide ondoko bidegurutze batean daude, eta ikusgaitasuna oztopatzen dute. Zaborra jasotzera datorren kamioa ere errepide erdian gelditu behar da, eta hori ere arriskutsua izan liteke”.
Arrazoi horien guztiengatik, edukiontziak lekuz aldatuko dituzte; 25 bat metro haruntzago ipiniko dituzte, autobus geraleku alboan. “Kamioa errepidetik baztertu ahal izateko toki egokia egingo da, eta laister organikoa ere jasotzen hasiko garela kontuan hartuta, edukiontzi guztientzako ere nahikoa leku egongo da”.
Gizaburuagako frontoiko lanak. Argazkia: Gizaburuagako Udala
