Ane Urkiri kirol kazetariak aurkeztuko du Mutrikuko VI. Kirol Gala
Mutrikuko Udalak antolatuta, VI. Kirol Gala egingo da barikuan [abenduak 14], 19:00etatik aurrera, udaletxeko areto nagusian. Gala, estreinako, Ane Urkiri kirol kazetari mutrikuarrak aurkeztuko du. “Aurkezle lanetan Txemi Galarraga izateko zortea izan dugu aurreko bost urteotan. Ordezko bikainak ordezkatuko du Txemiren lana. Eskerrik beroena Txemiri”.
Ekitaldiarekin, hain zuzen ere, kirol munduan dabiltzan eta ibili diren pertsona edo eragileei onespena eta eskerrak eman nahi zaie sari baten bitartez. Urtero modura, lau sari banatuko dira: Kirolari onena, Kirol talde onena, Kirol ibilbide onena eta Aipamen berezia.
Sarientzako hautagaien zerrenda honakoa da: Xake taldea, Nekane Ituarte, Alberto Gorritiberea, Futbol taldeko neskak, Eskubaloiko nesken taldea, Saskibaloiko nesken taldea, Marea Urdina, Maite Barruetabeña, Eneritz Lizardi, Marije Ituarte, Iratxe Barruetabeña, Iñaki Agirrezabala, Kosme Arrieta eta Oihana Kortazar.
Aurtengo sarituak jakitera eman eta oroigarri banaketa egin ondoren otordu txikia egongo da bertaratzen diren guztientzat.
