Protesta egin dute Ondarroa eta Lekeitioko Correoseko langileek, Elorrion hildako langilearen omenez

2018/12/14

Ondarroa eta Lekeitioko Correoseko langileek protesta egin dute gaur [abenduak 14] goizean. Ondarroan enpresa guztiz itxi egin dute, eta langile guztiek protesta egin dute lantokiaren aurrean. Lekeition, ostera, 13:30etik 15:30era egin dute lanuztea; elkarretaratzea ere egin dute, eta ostean pankarta ipini dute Correosen horman. Protestagaz, eguaztenean [abenduak 12] Elorrion lan istripuz hildako lankidearen heriotza salatu nahi izan dute. Lehenik eta behin, elkartasuna helarazi nahi izan diete langilearen senideei eta lagunei, eta euren saminagaz bat egiten dutela nabarmendu dute.

Correoseko langileen protesta, Ondarroan

Lekeitioko Correoseko langileak.

Lekeitioko Correoseko langileak, elkarretaratzean.

Hildako langileak bi hilabeterako behin-behineko kontratua zuen; azaroaren 20an hasi zen lanean 46 urteko elorriotarra. “Beste behin ere langileok pairatzen ditugun lan karga jasaezinak salatu beharrean gaude”. Era berean, aldi baterako kontratatzen dituzten langileei ez dietela trebakuntzarik ematen salatu dute. “Batez ere, motorrean aritzen direnen kasuan, lan kontratuak oso motzak dira, askotan egun batzutarakoak, nahiz eta enpresan dozenaka lanpostu hutsik egon. Eta nola ez, azkenaldian prekarietatea nabarmen igo da Correosen”. Bilbon ere protesta masiboa egin dute eguerdia, Correoseko bulego nagusiaren aurrean.