Gaurko eta biharko pentsiodunen duintasuna defendatzeko manifestazioa egin dute gaur, Ondarroan

Larraitz Ibaibarriaga Etxaburu

2018/12/15

Ez daukate gelditzeko asmorik. Ez dira geldituko. Pentsiodunek kalera ateratzen jarraituko dute. Gaur ere horrela egin dute. Kalera atera dira ia orain dela urtebetetik egiten ari diren modura. Bizkaiko Pentsionistak Martxanen deiagaz bat eginda, Ondarroan egin dute manifestazioa gaur eguerdian [abenduak 15, zapatua]. Ume, gazte eta heldu, ehunka pertsona bildu dira, duintasunez bizi ahal izateko pentsioak eskatzeko, eurenak eta atzetik datozenenak. 1.080 euroko gutxieneko pentsioa; KPIaren araberako igoera, sostengarritasun faktorea bertan behera uztea; lan eta pentsioen erreformak deuseztatzea; genero arrazoiei loturiko soldata eta pentsioen arrakalak ezabatzea; behartutako aurrejubilazioa ez zigortzea eta Pentsio Sistema Publikoaren ordez BGAEak ez ezartzea eskatu dute.

Bizkaiko Pentsionistak Martxanen manifestazioa

Manifestazioa, Nasa kalean.

Gogoratu dute urtarrilaren 15ean urtebete beteko dela mobilizazioekin hasi zirenetik. Pozik ospatuko dutela adierazi dute, mugimendu anitz eta helburu amamkomunen inguruan milaka pentsionista elkartzea lortu dutelako. Dena dela, gazteriagaz eta beste agente sozialekin bat egiteko erronka dutela aurretik esan dute: “Gaur hemen ikusten dugunez, alde horretatik ere, ari gara urratsak ematen”. Borrokan tinko. Mobilizazioagaz bat egin dutenei eskerrak eman eta datorren astelehenean berriz ere kalera ateratzeko deia egin dute, gaurko eta biharko pentsidunen aldeko duintasuna lortzeko bidea borroka dela berretsiz. Gazteria aurrera, Emakumeak aurrera, Pentsiodunak aurrera ohikatuz eta txalo artean amaitu da manifestazioa.