Nekaezin ari dira zaintzen txondorra Markina-Xemeinen

Larraitz Ibaibarriaga Etxaburu

2018/12/15

Atzo goizean [abenduak 14] piztu zutenetik, ez diote begirik kentzen. Egur ikatzezko txondorra asko kostata egin dute, sasoi bateko ikazkinek egin legez, eta datorren zapatuan [abenduak 22] itzali arte, boluntarioek jo ta su zainduko dute. Euria ari zuela piztu zuten egur meta, azken egunetan estali duen estalkiagaz karpa bat egin eta haren babesean. Eta iragarri modura, jai giroan piztu zuten atzo iluntzean, Eneko Arrate eta Josune Aramendiren bertsoak eta Asensio eta Marije trikitilarien doinuak lagun. Ordu txikiak arte luzatu zen festa, kontu eta barre algara artean.

Txondorra pizten, abenduak 14 goizean. Argazkia: Josu Arrate

Txondorrak astebete egingo ditu piztuta, eta uneoro egongo dira arduradunak zaintzen, gau eta egun. Lau ordutik behin, gutxi gorabehera, egur gehiagogaz elikatuko dute. Itzali ostean, herriko elkarte, talde zein banakoen artean banatuko dute ikatza. “2o kilo inguruko 60 zaku eskatu ditugu. Halako zerbait aterako dela uste dugu”, azaldu dute txondorraz arduratzen ari direnek.

[ikus ZUZENEAN argazkiak]

Auzolan ekimena. Herritar talde baten ekimenez eraiki dute txondorra, auzolanean, Xemeingo aparkalekuaren ondoko zelaian. Egitasmoagaz bat egin dute bai eta ere Markina-Xemeingo Udalak eta Jai Batzordeak, Ahaztuen Oroimena elkarteak eta herriko Guraso Elkarteak. Herriko ikastetxeetako ikasleek ere parte hartu ahal izan dute eraikuntza prozesuan. Joan den astean bisitatu zuten ume eta gazteek; ikazkinen lana eta txondorgintza hurretik ezagutu ahal izan zuten adituen eskutik. [ERREPORTAJEA] Ikazkinen lana berreskuratzen