100 bat igerilari batuko ditu 30. Ondarroa Sariak
Txapelketa 10:00ak inguruan hasiko da eta bazkaltzeko ordurako amaitu. Ondarroa, Markina-Xemein, Zalla, Igorre eta Lekeitioko igerilariek egingo dute uretara dzanga.
Ondarru Igeri Taldeak antolatuta, igeriketako 30. Ondarroa Saria jokatuko dute zapatuan [otsailak 8] Zaldupe udal kiroldegiko igerilekuan. Antolatzaileek iragarri dutenez, eskolar mailako eta federatutako 100 igerilari inguruk dzanga egingo dute uretara Ondarru Sariaren bila.
Herriko igeri taldeko 40 bat lagunez gain, Markina-Xemeindik, Zallatik eta Igorretik etorritakoak ere batuko dira urteroko topaketan. “Lekeitiarrak ere gonbidatu ditugu, baina duatloi denboraldia hasten denez, ez dakigu zenbat lagun etorriko diren”.
LH 3tik hasita Batxilergo bitartean dauden ikasleek parte hartuko dute batez ere. “Tartean, master gutxi batzuk ere parte hartuko dute”. Igerilariak 09:00etarako beroketak egiten hasiko dira, eta 10:00ak bueltan egingo dute lehenengoek uretara dzanga. Txapelketaren batean egiaztatuta duten denboraren arabera antolatuko dituzte txandak. “Adina ez da kontuan hartuko. Antzeko marka dutenen aurka egingo dute igerian, baina sailkapenak gero adinaren arabera egingo dira”.
50 metro eta 100 metroko lasterketak tximeleta, bizkar, bular eta crawl estiloetan egingo dute igeri parte hartzaileek. Horrez gain, taldekako errelebo lasterketak ere egingo dituzte estiloetan zein crawl erara.
Txapelketa amaitu eta sari banaketa egin bitarteko atsedenaldian (13:00ak inguruan), berriz, Ondarroako igeri eskolakoek erakustaldia egingo dute. Normalean erakustaldia arratsaldean egin ohi izan dute, baina aurten, estreinako, erakustaldia eguerdian egitea erabaki dute. “Txapelketa amaitu, eta sailkapena osatu bitartean denbora asko egoten da, eta aurten tarte hori aprobetxatuko dugu erakusketa egiteko”.
Haur bakoitzak luze bat egin beharko du crawl estiloan eta beste bat bizkar estiloan. “Erakusketa ikusi nahi dutenen gurasoek horretarako aukera edukiko dute. Oinetako egokiekin erakusketa ikustera igerilekura sartzeko aukera edukiko dute”.
Ikusleek bestelakoan, igerileku kanpotik jarraitu ahal izango dute txapelketa. Igerilekuaren kanpoko leihoetatik zen sasoi batean taberna zen gela ere ikusleentzako egokituko dute. “Bozgorailuak egongo dira ipinita gela horretan, txapelketa jarraitu ahal izateko”.
Kiroldegiko zuzendaritzak zabaldutako ohar baten arabera, igerilekuak itxita egongo dira txapelketak dirauen artean. Gogorarazi dutenez, igerilekua itxita egongo da 09:00etatik 13:30era bitartean.
