Ikusmin handiagaz inauguratu dute Etxebarrian skateparka
Victor Medrano Espainiako txapeldunak eta bi taldekidek erakustaldi ederra eskaini dute instalazio berrian. Garrantzitsuena minik ez hartzeko neurriak hartzea dela adierazi dute.
Victor Medrano Espainiako roller txapelduna, erakustaldian Ume, gazte zein nagusi. Inork ez du galdu izan nahi gaur [otsailak 8] Ibaun parkean kirol ekipamendu berriaren irekiera ofiziala. Jesus Iriondo Lejardi alkateak eman die ongietorria bertan bildutakoei. Bertan zegoen parkea diseinatu duen arkitektua, eta bertan zegoen baita ere hiru aldiz Espainiako absolutu mailako patinaje txapeldun Victor Medrano skater bilbotarra. “Skateparka oso ondo dago hasteko. Materiala egurrezkoa izatea eta barandak okerdurekin egotea oso ondo dago. Eta komunak esku-eskura egotea primerakoa da. Skaterrok askotan ez daukagu ez komunik ez edateko aukerarik entrenatzen dugun lekuetan”.
Skateparkak bizikleta, scooter, skate edota patinekin ibiltzeko aukera eskaintzen du, eta gaurko erakustaldia, zelan ez, patinekin egin du Medranok. Dena dela, ez da bakarrik etorri. Ondoan izan ditu Eneritz eta Joel BilboBladerseko taldekide gazteak.
Euritan egin dute erakustaldia, eta behin baino gehiagotan egin dute txirrist; kontu handiz ibili dira, eta behin baino gehiagotan adierazi dute arriskurik hartu gabe aritu behar dela skateparkean. “Gutxika-gutxika hasi behar da, arriskurik hartu gabe. Garrantzitsua ez da gauza zailak egitea, garrantzitsua ondo egitea da, min hartu gabe”. Horretarako, hasieran norbaiten laguntza edukitzea gomendatu du Medranok. “Beti kaskoa erabili behar da, eta gorputza eta besoak aurrerantz bota behar dira, atzeruntz ez jausteko”. Ipurdikoren bat edo beste ez hartzea ezinezkoa izanik, ondo jausten jakitearen garrantzia ere aipatu du: “Eskuekin eta belaunekin jausi behar gara”.
Jesus Iriondo Lejardi alkateak eman ditu parkeari buruzko azalpenak.
Skateparka arrapalak baino askoz gehiago da. Barandak, lauki luzeak, lurra… elementu asko ditu 500 metro koadroko azaleran. Eta guztiak erabili daitezke skatea praktikatzeko. “Bakoitzak nahi duena egin dezake, ez bakarrik hankekin, eskuekin ere bai”. Eta hala egin dute beraiek, ikusleen gozamenerako.
Malgua eta moldagarria. Zurruntasunetik ihesean, naturari erroturiko skateparka egin nahi izan dute Ibaun parkean. Elementuak ez daude lerrokatuta, eta hala nahi denean, eraldatu egin daitezke, parkeari mugimendua eskainiz, aldatzeko aukera eskainiz. “Skateparkean ez daude neurri bereko bi linea. Malevich laukia izeneko diseinua dauka. Horrek esan nahi du ez dela elementu estatikoa, mugimenduan dagoena baino”, azaldu du alkateak.
Skateparkaren irekiera eginda, datorren urtean ur txorrotak amaituta egotea aurreikusi du alkateak. Herritarren eskariei erantzuten jarraituko dutela esan du.
