Markina-Xemeingo Zuhaitz, Landare eta Tresneria azokak erantzun ona jaso du
Izandako salmentekin pozik azaldu dira mintegietako kideak. Lehen orduan saldu dute gehien, eta euriak baldintzatu ditu eguerdiko salerosketak. Ekoizleen postuetan, eguerdi partean egon da mugimendurik handiena.
Markina-Xemeingo Zuhaitz, Landare eta Tresneria Azoka Ondo joan dira salmentak Markina-Xemeingo XVIII. Zuhaitz, Landare eta Baserri Tresnerien Azokan. Frontoiaren aldean jarri dituzte aurten azokan parte hartu duten 11 mintegietako postuak. Urteetan datozenak ziren batzuk, eta lehen aldiz etorri denik ere ez da falta izan. Landare ekoizleak “pozik” zeuden jendearen erantzunagaz. Ohi legez, zer erosi argi zeukatenek lehen ordua aukeratu dute “piezarik dotoreenak” etxera eramateko, eta azokak ateak zabaldu orduko joan dira erosketak egitera. Asko izan dira erosle goiztiarrak. Gainerakoek eguerdi partean egin dute azokan buelta, eta haiek ere, tartean-tartean, eskuratu dute zer edo zer. Zuhaixka eta landare poltsekin ikus zitekeen jendea azoka eremuaren inguruan.
“Lehen aldiz etorri gara Markina-Xemeingo azokara, eta egia esan, lehen orduetan asko saldu dugu, uste baino gehiago. Pozik gaude. Tolosara joan da aita, hango azoka ezagunagoa da, eta herriak bizilagun gehiago ditu, baina Markina-Xemeinen ere salmentak oso ondo joan dira”, zioen Murueta Mintegikoak atzean zeukan apal erdi hutsa seinalatuz. Arrasateko Ekoudalatxeko mintegikoak ere gustura zeuden. “Gure herrian ere egiten da halako azoka bat, baina hemen baino askoz mintegi gutxiagokoa. 11 mintegi egotea pozgarria da. Oso gustura gaude hemen, eta jendeak ere ondo erantzun du”.
Euria zegoen iragarrita, eta ez du hutsik egin. 12:15 aldera hasi dira lehen tantak, eta salmentetan asko igarri da hori: “Hemendik aurrerakoak egin du. Euriak dena baldintzatzen du beti”, zioten, penaz.
Eskualdeko ekoizle postuetan eguerdian ibili da jende gehien
Eskualdeko ekoizleek ere hitzordua izan dute azoka eremuan. Goizen baino, eguerdiruntz hasi zaizkie herritarrak postuetara gerturatzen. “Orain dela urte batzuk jendea goizago etortzen zen, baina, orain, egueriko giroagaz batera hasten dira etortzen gehienak”, zioten. Euripean, baina ibili da jendea batera eta bestera, ogi, gozoki, sagardo edota jogurtek erakarrita. Eta sabela berotu nahi izan dutenek esku-eskura izan dituzte talo postuak.
Izarbidean, pozik. Frontoi txikiaren aterpearen babesean jarri dituzte merkatu txikiko postuak eta Izarbidean elkartearena. Mari Eli Ituarte Izarbideanen presidentea pozik zegoen jendeak emandako erantzunagaz. Goxokiak eta tortilla pintxoak izan dituzte salgai, eta salmentak oso ondo joan zaizkie. “Aurrera eramateko ekintzetarako oso ondo etorriko zaigu gaur ateratakoa. Bihar, esaterako, Bilbora doaz kide batzuk, antzezlan bat ikustera”.
