Zaldibarren desagertutako bi langileen autoak izan daitezkeenak agertu dira hondakinen artean
Gaur goizean [otsailak 8] ekin diete bilaketa lanei, baina eguerdian bertan behera utzi behar izan dituzte, euriak lursailaren ezegonkortasuna areagotu duelako. Larrialdi zerbitzuak bihar goizean bilduko dira, bilaketagaz jarraitu ala ez baloratzeko.
Argazkia: UVR Ertzaintza Gaur [otsailak 8] 09:00etan ekin diete larrialdi zerbitzuek Zaldibarko zabortegian desagertuta jarraitzen duten Markina-Xemeingo eta Zallako langileen bilaketa lanei. Lur mugimendu gehiago egoteko arriskuagatik, eskuz egin dituzte lanak, baina eguerdirako, bertan behera utzi behar izan dituzte, “euriak lanean ari diren lursailaren ezegonkortasuna areagotu duelako”. Bihar goizean [otsailak 9] bilduko dira erreskate taldeak, bilaketagaz jarraitu ala ez baloratzeko. Gaur goizean jakinarazi dutenez, hondakinen artean langileen autoak izan daitezkeenak topatu dituzte. Atzo arratsaldean [otsailak 7] aurkitu zituzten ibilgailuak.
Bestetik, atzo arraltsaldean sute txiki bat piztu zen zabortegiaren goikaldean, eta oraindik ez dute lortu itzaltzerik. Suhiltzaileek sutea non den badakite, baina kokapenagatik, gaitza da hara heltzea.
Eguenean [otsailak 6] 16:00ak aldera gertatu zen lur jausia Zaldibarko zabortegian, eta Verter Recycling enpresako bi langile desagertuta daude ordutik. Ustez azpian harrapatuta geratu ziren, eta, beraz, haiek bilatzeko lanak hasi zituzten. Atzo [otsailak 7], baina, eten egin behar izan dituzte bilaketa lanak, lan osasuneko teknikariek amiantoa atzeman dutelako zabortegian. Ingurua aztertu ostean atzo arratsaldean jarraitu zuten erreskate taldeek bilaketagaz. Osalan lan segurtasuneko agentziak espezializatutako enpresa baten laguntza edukiko zuen horretarako.
Lur jausiagaz, 500.000 metro kubo lur eta zabor erori ziren A-8 autobideraino, eta errepidea itxita geratu zen guztiz lehen orduetan.
Babes osoa hurrekoentzat. Markina-Xemeingo Udalak babesa adierazi die Zaldibarko zabortegian izandako lan istripuaren ondorioz desagertuta jarraitzen duen Markina-Xemeingo herritarraren senide eta gertukoei.
