Hil egin da Mutrikuko portuko uretan agertutako izurdea
Izurde marradunaren gorpua Plentziako Itsas Estazioa Itsas Biologia eta Bioteknologia Esperimentalen Ikerketa Zentrora eraman dute nekropsia egiteko. Lehen datuen arabera, izurdea emea eta gaztea da.
Mutrikuko izurdea hilda. Argazkia: Ambar elkartea Ambar Itsas Faunaren Ikerketa eta Babesaren Elkarteko kideek jakitera eman dutenez, azken egunotan Mutrikuko portuko uretan ibili den izurdea domekan [otsailak 9] hil zen. Zehatz esanda, izurde marraduna (Stenella coeruleoalba) 10:00ak aldean Intxirrixan hilik agertu zen, Bentalekurantz igotzeko eskaileren parean. “Ez da nahi genuen amaiera izan, baina espero genuena izan da”.
Albistearen berri eduki orduko, Ambarreko kideak Mutrikura hurbildu ziren, eta animaliaren gorpua jaso zuten, 14:00ak aldera. “Animaliaren gorpua nekropsiak egiten ditugun tokira lekualdatu genuen, Plentziako Itsas Estazioa Itsas Biologia eta Bioteknologia Esperimentalen Ikerketa Zentrora. Animalia nahikoa txikia denez, guk geuk lekualdatu genuen”.
Ambarreko kideek esan dutenez, hilik agertutako izurdea emea eta gaztea zen, tamainagatik. “Oso txikia zen. Metro eta erdi baino gutxiago neurtzen ditu”. Azpimarratu dutenez, animaliaren heriotzaren arrazoia ez dute ezagutzen oraindik. Egunotan nekropsia egingo diote, eta emaitzek, beharbada, argituko dute heriotzaren zergatia. “Batzuetan animalia zergatik hil den jakiteko gai gara, baina beste batzuetan ezinezkoa izaten da. Kasu horietan, animaliaren organoen zatiak jasotzen ditugu eta biobankuan gorde, etorkizunean horiek aztertu eta beharbada zergatia ezagutzeko”.
Ambarreko kideek ohartarazi dutenez, herritar batek baino gehiagok animalia zergatik ez diren salbatzen ahalegindu galdegin diete. Horretarako pisuzko arrazoiak daudela azpimarratu dute. “Izurde marradunak oso basatiak dira; kostaldera, soilik, gaixorik edo txarto daudenean hurreratzen dira. Horrelako egoera baten aurrean animalia portutik ateratzeko harrapatzen saiatuz gero bihotzekoak jota hil daiteke, egoerak sortutako estresa dela eta. Arrazoi hori jende askok ez du ulertzen; animalia bai edo bai bizirik atera behar dugula uste du. Animalia basatiak dira, eta berez ere hil egingo lirateke, eta kasu horretan lasai hiltzen utzi behar zaio. Animalia ondo dagoela eta bizitzeko aukerak dituela ikusiz gero, dudarik gabe, beste zerbait egiten saiatuko ginateke”.
