Inauteri kalejira koloretsua egin dute Ondarroan Lantzoi jaunaren atzetik
Gaurko inauteri kalejirako protagonista nagusiak ikastetxeetako ikasleak, irakasleak, gurasoak eta kuadrillak izan dira. Akularen enterruaren aurretik zer ospatu egongo da Ondarroan.
Ondarroako ikasleak inauteri martitzeneko kalejiran Zapatuan [otsailak 22] hasi ziren inauteriak ospatzen Ondarroan, eta gaurkoa [otsailak 25] ere mozorrotzeko eguna izan dute. Ikasleen kalejira koloretsuagaz biztu da gaurkoan festa. Egunaren hasieran euria ari bazuen ere, azkenean Inauteri Eguneko kalejira egitea erabaki dute herriko ikastetxeek. Ibaiondotik hasitako kalejirako protagonista nagusiak, ikasleak, gurasoak, irakasleak eta herriko kuadrillak izan dira.
Askotariko mozorroak soinean zituztela Lantzoi jaunaren atzetik Itsasaurreko plazara egindako bidea kolorez eta dantzez jantzi dute beste behin ere. Tartean, gainera, egunotan prestatutako koreografia landuak eta dantza bereziak egin dituzte, ikusleen gozamenerako.
Jaia Itsasaurren amaitu dute, Txirrimorraskiko kideekin batera lantzeko inauterietako dantzak egiten. Dantza saioa egiten ari zirela, baina, sekulako zaparrada hasi du, eta denak aterpe bila hasi dira. Arratsaldean jarraituko du egitarauak; Akularen enterruaren aurretik playback lehiaketagaz eta inauterietako dantzez gozatzeko tartea egongo da.
Lehiaketaren irabazleak. Ondarroako Udalak jakitera eman duenez, bestalde, inauterietarako denden erakusleiho eta tabernak apaintzeko antolatutako lehiaketak Lorak Esther lora dendak eta Boga-Boga tabernak irabazi dituzte. Lorak Estherrek, hala 300 euroko saria irabazi du eta Boga-Bogak, berriz, 500 eurokoa. Diru sariaz gain, garaikur bana ere jasoko dute.
Bi lehiaketen saridunez gain, aipamen bereziak ere egin ditu epaimahaiak, 100 euroko diru sariagaz. Tabermen aipamen berezia Beikozinirentzat izan da, eta dendena, ostera, Vitoria optikarentzat. Sariak gaur banatuko dituzte playback lehiaketa hasi baino lehen. Guztira, zortzi tabernak eta lau denak parte hartu dute lehiaketan.
Playback lehiaketa. Arratsaldean Beikozinin egin den playback lehiaketak areto bete jende batu du. Zortzi taldek parte hartu dute, eta Marabillosuk kuadrillak irabazi du lehen saria, Gatiburen “Ez naz makurtuko” abestiagaz. Desastrik eta Nahastosuk eskuratu dute, hurrenez hurren, bigarren eta hirugarren saria.
