Hastear dago antxoa kanpaina
Eguraldi ona baldin badago, ontziek astelehen goizean irtengo dute antxoatara. Berdel kanpaina abian badago ere, berdelik ez dute lehorreratu egunotan. Asteon parrotxa ale batzuk arrantzatu dituzte.
Udaberria gerturatzen ari da, eta horregaz batera, hastear dago antxoa kanpaina ere. Kanpaina ofizialki, martxoaren 1ean zabalduko dute, baina domeka denez, baxurako arrantzaleak astelehenera arte ez dira kantauri itsasoko arrain preziatua arrantzera itsasoratuko. “Eguraldi ona baldin badago itsasontzi guztiak astelehen goizean itsasoratuko dira”, azaldu dute Ondarroako Kalare Deuna kofradiako arduradunek.
Kofradiako iturriek nabarmendu dutenez, ontziak ezingo dira 09:00ak aurretik itsasoratu. “Lehen benta ere ezingo da 12:00ak aurretik egin”. Itsasoa egoera onean baldin badago eta sareak antxoaz betetzen baldin badira, martitzen [martxoak 3] goizeko bentan lehen antxoa aleak saltzea espero dute Ondarroan.
Berdel kanpaina, ostera, zabalik dago, baina baxurako ontziek ez dute askorik arrantzatu oraindik. Gaur [otsailak 27], esaterako, kaxa bakarra lehorreratu dute . “Kiloa lau euro inguruan saldu da bentan”.
Egunotako arrantza salmentari dagokionez, ez da ezer aipagarririk egon Kalare Deunako bentan. Asteon, oro har, nahikoa eguraldi txarra egon da itsasoan, eta hori dela eta, salmentetan ere eragina eduki du. Martitzenean [otsailak 25] arrainagaz lehorreratu zirenek, portuan geratzea erabaki zuten, eta eguaztenean [otsailak 26] ere portuan lotuta egon ziren. “Eguaztenean, esaterako, ez zen bentarik egon”.
Egunotan, batez ere, tamaina txikiko sardina lehorreratu dute. Parrotxa, oro har, oso merke saltzen ari dira bentan. Garestien 0,60 zentimoan saldu da kiloa eta merkeen, 0,25 zentimotan. Oraindik ere ontzi gutxi ari dira porturatzen Ondarroan, baina parrotxa lehorreratu dutenek 700 bat kaxa arrantzatu dituzte. “Ez dira kopuru handiak. 4.000-5.000 kilo lehorreratu dituzte bakoitzak”.
