Angeluko hilketa matxista salatzeko protestak, Lea-Artibai eta Mutrikun
Aulestin, Mutrikun eta Lekeition kazola jotzeko deia egin dute; Mutrikun eta Lekeition 19:45ean jarri dute hitzordua, eta Aultestin 20:00etan. Euskal Herriko Emakumeon Mundu Martxak ere antzeko deia egin du.
Lea-Artibai eta Mutrikuko hainbat talde feministek eguazteneko [maiatzak 6] Angeluko hilketa matxista salatzeko ekimenak egingo dituzte gaur [maiatzak 8]. Aulestik, Mutrikuko EMA eta Lekeitioko Potxuak Martxan elkarteek Internet bidez zabaldu duten mezuan kazola jotzeko deia egin diete herritarrei. “Atera zarata erasoen aurrean”. Mutrikun eta Lekeition 19:45ean jarri dute hitzordua, eta Aultestin 20:00etan. Etxetik irten gabe, leiho eta balkoietatik lapiko hotsa aterako dute indarkeria matxista salatzeko.
Euskal Herriko Emakumeon Mundu Martxak ere egin du dei hori; 19:00etan, sirena hotsekin batera, kazolak jotzera deitu dute. Petoak jantzi eta kalera Hiltzen gaituzte edo Beste emakume bat eraila mezuekin ateratzeko eskaria ere egin dute. Ondarroan, bestalde, atzo [maiatzak 7] egin zituzten hilketa matxista salatzeko ekimenak. Leiho eta balkoietan ikur feministak ipintzeko deia egin zuten.
Gertatutakoa. Angeluko larrialdi zerbitzuek etxebizitza batean bi hilotz aurkitu zituzten eguaztenean [maiatzak 6]; 83 urteko emakume bat eta haren 89 urteko senarra hilik aurkitu zituzten, bi kasuetan suzko arma erabilita. Ikerketaren lehen ondorioen arabera, senarrak emaztea hil zuen, eta ondoren, bere buruaz beste egin zen. Datuak kontuan hartuta, 2020an Euskal Herrian indarkeria matxistagatik hil duten laugarren emakumea da Angelukoa; bigarrena konfinamendua hasi zenetik.
