Herritarren aldarrikapenak plazara eraman ditu Hamaika Gara kanpainak
Etxebarrian, Lekeition, Ispasterren, Mendexan, Markina-Xemeinen eta Ondarroako plazetan kolore desberdinetako aldarrikapenak eskegi dituzte.
Hamaika Gara ekimena Ondarroan. Argazkia: Gure Esku Ondarroa Hamaika Gara ekimenaren baitan hainbat mobilizazio egin zituzten domekan [ekainak 7] bertoko hainbat herritan. Gure Esku herri dinamikak deituta, kaleko jarduerak berreskuratu eta herritarren aldarrikapenak plazara eraman zituzten Hamaika Gara kanpainaren barruan. Herriak eta plazak “erabakitzeko eskubidearen eta burujabetzaren plazak bihurtu ditugu”.
Hemen erabaki, herritarrok erabaki lelopean eguerdi aldera egin zuten ekimen bateratua. Etxebarrian, Plaza Barrin egin zuten ekintza, Lekeition, udaletxeko eskaileratan; Ispasterren, kanpoko frontoian; Mendexan, plazan eta Ondarroan Itsas Aurren batu ziren 11:00etatik 14:00etara. Markina-Xemeinen, berriz, 12:00etan hasi zuten ekimena Plazabarripean. Egoerak eskatzen duen modura osasun neurri guztiak zainduta egin zuten ekimena; parte-hartzaile bakoitzak bere aldarria kartoi zati batean idatzi eta etxetik plazara eraman zuen. Bertaratzean lurrean utzi, eta herri dinamikako arduradunak arduratu ziren berau eskegitzeaz. Aldarriak idazteko kartoi eta errotuladoreak herritarren eskura ere jarri zituzten Gure Eskukoek.
Ondarroako arduradunak, esaterako, pozik geratu dira ekintzagaz, eta balorazio positiboa egin dute. Herri dinamikako kideek azaldu dutenez, kalean kolore desberdinetako aldarrikapenak ikusi ahal izan ziren. “Denek ere zelako gizartea antolatzen joatea gustatuko litzaiguken adierazten dute”.
Josu Etxaburu Gure Eskuko bozeramailearen iritziz plaza publikoak berreskuratzen hastea garrantzitsua da. “Bada sasoia balkoi eta leihoetan halabeharrez eduki ditugun aldarrikapenak berriro plazetara eramateko. Atzoko eguna garrantzitsua izan zen hortik alderditik”.
Lehen erabakitzeko arrazoi asko bazeuden ere, azken asteotan jasandako pandemiak arrazoi horiek guztiak gehiago azaleratu dituela nabarmendu du Etxaburuk. “Aldarrikapenetan bertotik nahi dugula erabaki azaleratu da. Gure Esku modura esan genuen onartezinak iruditzen zitzaizkigula alarma egoera dela-eta hartutako erabaki zentralizatzaileak. Egunotan egindako ekintzetan, ostera, herritarrok agertu dugu Euskal Herritik nahi dugula erabaki. Are gehiago, erabakitzeko aldarria inoiz baino argiagoa ikusten da, eta hori ere azaleratu egin du. Horregaz oso pozik gaude. Azken finean hori da Gure Eskuk defendatu duena: bertotik erabakitzeko eskubidea eta tokian tokiko erantzunak emateko beharra”.
