Hiru oinarri edukiko ditu Etxelilaren programazio berriak
Azken urteotan egin modura, Emakumeentzako Jabekuntza Eskolan eta Parte hartze gune irekietan parte hartzeko aukera egongo da. Aringaingan taldearen aurkezpena, esaterako, eguenean egingo dute.
Etxelilaren programazio berriaren aurkezpena. Argazkia: Ondarroako Udala Urritik hasi eta uztailare bitartean, feminismoagaz lotura duten hainbat arlo landu eta beste hainbat esparru ikutuko dituzten ikastaroak, berbaldiak eta tailerrak eskainiko dituzte Ondarroako Etxelilan. Azpimarratu dutenez, aurkeztu berri duten Etxelilaren aurtengo programazioak hiru oinarri edukiko ditu.
Azken urteotan egin modura, Emakumeentzako Jabekuntza Eskolan eta Parte hartze gune irekietan parte hartzeko aukera egongo da, eta berritasun modura, Eztabaida Gune Feministan ere parte hartu ahal izango da. “COVID-19ak eragindako errealitate berrira moldatzeko asmoz, ohiko Emakumeentzako Jabekuntza Eskolaz gain, jarduera irekiez osatutako proposamen bat prestatu dugu aurten: Eztabaida Gune Feminista. Honen helburua, aditu batek gidatuta, herritar guztiei zuzendutako jarduerak antolatzea da, hausnarketa eta eztabaida feministak garatzeko espazio bat zabalduz”.
[2020-2021 ikasturteko programa irakurri HEMEN]
Egoera berrira Etxelila eta bertako ikastaroak zelan moldatuko diren ere azaldu du Irina Alkorta Bedialauneta Berdintasun zinegotziak. “Momentu bakoitzean indarrean dauden neurriak hartu beharko dira. Momentuko aforoaren mugak errespetatu beharko dira; horregatik, hitzaldi eta tailer irekietara ordurako etortzea eskatzen dizuegu, eta aforoa betetzen bada, errespetatzea”. Aurrez aurreko saioak egotea ezinezkoa bada, alternatibak bilatuko dituztela gaineratu du. “Aurrez aurreko jarduerak ezingo balira egin, eta posible den kasuetan, era telematikoan eta plataforma digitalen bitartez eskaintzen saiatuko gara”.
Aurkezpenak. Parte hartze guneei, dagokienez, aurten lau gune egongo dira abantean: Aringaingan, Literatura eztabaidatzeko gunea, Andrabanda feminista eta Neska gazteen txokoa. Arantza Burgoa Agirregomezkorta kirolariak dinamitzatzen duen Aringaingan taldearen aurkezpena, esaterako, eguenean [urriak 8] egingo dute, 19:00etan hasita. Azaroaren 9an, berriz, Miren Larrea Murgoitiok dinamizatzen duen Neska gazteen txokoaren txanda izango da. 18:00etan egingo dute taldearen aurkezpena.
