Aurrerak puntu bategaz estreinatu du denboraldia
Ibon Lopezen mutilek husna berdindu dute Balmasedaren aurka. Etxeko taldeak gol aukera asko eduki baditu ere, ez du asmatu.
Aurreraren eta Balmasedaren aurkako norgehiagoka. Argazkia: Ondarroako Kirolaren Leihoa. Hirugarren mailara bueltatuta, ligako lehen neurketa jokatu zuen Aurrerak zapatuan [urriak 24] Zaldupen. Gol aukera bat baino gehiago izan bazuen ere, Balmasedaren aurka husna berdinduta amaitu zen norgehiagoka.
Lortutako puntua oso garrantzitsua dela azpimarratu du Ibon Lopez entrenatzaileak. “Ez da puntu eskasa; talde oso indartsua da Balmaseda. Guretzat garrantzitsua da denboraldia galtzen ez hastea. Gauzak ondo egin genituen, eta egindako lanagaz oso pozik gaude”.
Partiduaren kontrol osoa eduki zuen Aurrerak neurketaren lehen 75 minutuetan. Azken 15 minutuetan berdindu zen partidua; Balmaseda jokoan sartzen hasi zen, jokaldiren bat edo beste sortuta. “Hasieratik ondo sartu ginen partiduan. Beste taldea baino gehiago izan ginen. Ondo konbinatzen hasi ginen atzetik, aukerak sortzen… baina golak egiterako orduan asmatzea falta izan zitzaigun”.
Gol aukera asko izan zituen etxeko taldeak, batez ere lehen zatian. Aukerarik garbiena partidua hasi eta gutxira eduki zuten. Julen Fernandezek aterako falta bat Burgoak jaso zuen area txikian, baina atezainari hanketara bota zion. Eskuinetik, bestalde, Iker Urrestiren eta Julen Fernandezen jokaldi bat gol bihurtzeko zorian egon zen. Lejardik ere zelai erdian baloia lapurtu, eta aurrean zegoen atezaina gainditu ostean oso gutxigatik langa gainetik joan zen baloia. Lehen taldeagaz debutatu zuen Manex Irizarrek ere partidu ona egin zuen. “Arrisku asko sortu zuen. Kornerrean amaitu zuten pare bat erdiratze egin zituen, nahiz eta errematean amaitu ez”.
Bigarren zatian ere egon ziren gol aukerak. «Hegaletik asko ailegatu ginen. Partidua amaitzeko 10 minutu falta zirenean Lejardiren jaurtiketa atezainak aldaratu zuen, eta area txikian geratu bazen ere, ez zuen jakin ondo errematatzen».
