Bisit Beiro Ondarroako zinegotzi ohia hil da
Eguaztenean [urriak 28] egingo dute haren aldeko hileta elizkizuna, Ondarroako Santa Maria parrokian.
Bisit Beiro Badiola 2015-2019 agintaldian Ondarroako Berdintasun arloko zinegotzia izandakoa zendu da. EH Bilduren zinegotzia izandakoa barikuan [urriak 23] hil zen gaixotasun luze baten ondorioz, 55 urtegaz. Eguaztenean [urriak 28] emango diote azken agurra; Ondarroako Santa Maria parrokian egingo dute haren aldeko hileta elizkizuna, 19:00etan.
Albistearen berri eduki orduko Ondarroako Udalak atsekabea azaldu zuen sare sozialen bidez, eta familia eta gertukoei doluminak eman zizkieten, haien saminagaz bat eginda. “Bisit Beirok utzi gaitu, aurreko agintaldian Berdintasun zinegotzi izan zenak. Bere nahiari jarraituz, goazen Ondarroa feminista eta anitz baten alde lanean jarraitzera. Alkate, zinegotzi eta udaleko langileen izenean doluminak eta besarkadarik estuena senide eta lagunei. Eskerrik asko herriari emandako guztiagatik”. Udaletxeko banderak ere masta erdira jaitsita egon dira asteburuan.
Udalean berdintasun arloko jarduerak bultzatzeaz gain, udalaz gaindiko beste hainbat elkartetan eta taldetan ere parte hartu zuen. Besteak beste, Zubi Zahar Herri Ikastolan ere batzordeko kidea ere izan da azken 20 bat urteotan. Hark egindako lana eskertu nahi izan dute. Besteren artean, UXU Ondarroako Emakumeen Taldeko, Traman & Brix antzerki taldeko, Karenka elkarteko edo Etxelilako kideek ere eskerrak eman dizkiote egindako lanagatik.
