Aurrerak husna berdindu du Beasainen aurka
Lehen 10-15 minutuetan Aurrera partiduan sartu ezinik ibili bazen ere, jokoan sartu eta Beasaini neurria hartu zion.
Aurrerak Beasainen aurka zelairatutako hamaikakoa. Argazkia: Leartigol. Aurrerak beste puntu bat lortu du hirugarren mailako bigarren jardunaldian. Lehen jardunaldian etxean husna berdindu ostean, Ibon Lopezen mutilek emaitza bera lortu zuen zapatuan [urriak 31] Beasaingo Loinatz zelaian. Entrenatzaileak azpimarratu duenez, pozik bueltatu ziren Beasaindik. “Puntuak gehitzen jarraitzen dugu. Bidezko puntua da. Aurreko astekoagaz alderatuta partidu desberdina izan zen, emaitza nahiz eta bera izan. Beasainek urte asko daramatza hirugarren mailan, eta talde oso arriskutsua da etxean”.
Partidu hasiera nahiko gogorra izan zen ondarrutarrentzat. Beasain gogor zelairatu zen, eta lehen 10-15 minutuetan nagusi izan zen. “Asko sufritu genuen. Ez ginen oso ondo sartu jokoan. Aurkariek jokoaren kontrol osoa eduki zuten, eta gol aukera argi bi ere sortu zituzten, batez ere, hegaletatik”.
15. minututik aurrera ondarrutarrak gutxinaka jokoan sartzen hasi ziren. “Hortik aurrera hobeto joan ziren gauzak. Zelaigunean hobeto kokatu ginen, eta joko sistema ere aldatu genuen”. Jokoan sartuta aukera argi bi ere eduki zituzten ondarrutarrek. Beasaingo atezainari pase luze batek eskuetatik ihes egin zion, eta huts horregaz baliatuta, Jon Martinezek langara jaurti zuen baloia. Handik minutu gutxira partiduko aukerarik garbiena eduki zuen Julen Fernandezek. “Baloi bat lapurtu genuen zelai erdian. Atezaina aurreratuta zegoen, eta jaurtiketa oso gutxigatik zutoin aldetik joan zen kanpora; gehienok barruan eduki genuen”.
Bigarren zatia, ostera, berdinduagoa eta parekatuagoa izan zen; Besainek zein Aurrerak gol aukera bat edo beste eduki zuten. Aurreraren aldetik Josu Aldazabalek pare bat jaurtiketa egin zituen atera eta Praderak ere eduki zuen beste aukera bat ere. Beasainen aukerarik garbiena jokoz kanpo argi batek eragin zuen. “Urruntze batean jokoz kanpo bat egon zela interpretatu zuen marrazainak; baloia gure jokalariek pasatu ziotela pentsatu zuen, nahiz eta kontrakoa gertatu. Beasaingo jokalari bat bakar-bakarrik zegoen aurrean, eta jaurtiketa, zorionez, gure atezainari eskuetara joan zitzaion”.
Zapatuan [azaroak 7] denboraldiko lehen garaipenaren bila zelairatuko da taldea Zaldupen. 17:00etatik aurrera Deusturen aurkako norgehiagoka jokatuko dute. “Etxean ea lehenengo hiru puntuak lortzen ditugun”.
