Eguaztenean estreinatuko dute Ondarroan grabatutako 'Hondar ahoak' telasaila
Nagore Aranburu eta Eneko Sagardoy dira thrillerretan eta zinema beltzean ohikoak diren elementuak uztartzen dituen istorioaren protagonista nagusiak.
Hondar ahoak telesailaren fotograma bat. Argazkia: Txintxua Films Udan Ondarroan grabatutako Hondar ahoak intrigazko telesaila eguazten [azaroak 4] gauean (22:30ean) estreinatuko dute ETB1en. 50 minutuko lau atalez osatutako minisailak thrillerretan eta zinema beltzean ohikoak diren elementuak uztartzen ditu. Koldo Almandoz gidoilari eta zuzendariaren jatorrizko ideian oinarrituta, Txintxua Films arduratu da telesailaren ekoizpenagaz.
Abuztuan egin zituzten fikziozko telesailaren grabaketak udalerrian. Zehazki, abuztuaren 3an hasi eta abuztuaren 28ra bitartean, Monica txaletean, Bide Onera zineman, Kalare Deuna kofradiako bulegoetan, Ondarroako portuan edo udaletxeko bulegoetan egin zituzten grabaketak. Nagore Aranburu eta Eneko Sagardoy dira Ondarroan girotutako genero beltzeko istorioaren protagonista nagusiak.
Trama nagusia euskal kostaldeko herri batean garatzen da, arrantza portu garrantzitsu baten inguruan. Itsasontzi bateko patroia desagertzen da, eta Nerea Garcia (Nagore Aranburu) polizia inspektorea Bilbotik ailegatzen da kasua ikerketzera. Herriko eta portuko girora hurbiltzeko Alex (Eneko Sagardoy) ertzain laguntzailea izango du ondoan. Antzezle zerrenda nagusia Iñaki Beraetxek, Sara Cozarrek, Ainhoa Artetxek eta Iraia Eliasek osatzen dute. Joxean Bengoetxea, Mikel Tello, Asier Hernandez eta Pako Revueltas aktoreek ere parte hartu dute telesailean. Omar Diop, Fanta Touty Diatta eta Ibou Sarr jatorri senegaldarreko aktore ez profesionalek ere parte hartu dute proiektuan.
