Indarkeria matxista desagerrarazteko beharra aldarrikatuko dute azaroaren 25ean
Adineko emakumeek sufritzen duten indarkeria matxista azaleratu gura izan du Emakundek. Aldundiak indarkeria matxista gertatu aurreko urratsen ikusezintasuna plazaratu du.
Indarkeria matxistak ez du adinik ezagutzen. Emakumeek gaztaroan, nerabezaroan eta adinekoak direnean jasaten dituzte biolentzia mota ezberdinak. Planak eta proiektuak gauzatu dira emakumeen aurkako indarkeria hori desagertarazteko, baina biolentzia matxista presente dago oraindik. Horrela, Emakumeenganako Indarkeriaren Aurkako Egunean, biolentzia matxista salatu eta desagertzeko eskatuko dute herritarrek.
Adineko emakumeek sufritzen duten biolentzia matxista azaleratu gura izan du Emakundek aurten, eta horiek jasaten duten indarkeria ezkutua ikusarazteko kanpaina abiarazi dute: Entzunez gero, ikusiko duzu. Soilik adi dagoen gizarte batek antzeman dezake indarkeria ezkutuena. Kasuen antzematea erraztu gura dute, horiei beharrezko baliabideak eskaintzeko. 55 eta 79 urte bitarteko zazpi emakume dira kanpainako protagonistak. Emakundek azaldu duenez, eurek “urte askotan” bizi izandako indarkeria ezberdinen benetako testigantzak jaso dituzte, eta euren aurkako indarkeriak dituen berezitasunak azaleratu dituzte.
Bizkaiko Foru Aldundiak, bere aldetik, indarkeria matxista gertatu aurreko urratsen ikusezintasuna plazaratu du Ez ikusi ez dagoenik. Indarkeria matxista da kainpainagaz. Teresa Laespada Berdintasuneko foru diputatuak dioenez, indarkeria matxista sortzen duten aurretiazko jarrera eta urratsak existitzen dira: “Askotan ez dira ikusten edo ez dira ikusi nahi aldez aurretiko seinaleak. Begirada berria jartzea eskatzen du, jarrera eta urrats horiek detektatzeko eta geldiarazteko”.
Indarkeria Sexistaren Kontrako Egunaren harira, gainera, urtero legez, Lea-Artibai eta Mutrikuko udalek adierazpen instituzionalak onartu eta sentsibilizazio eta kontzientziazio kanpainak bultzatu dituzte. Ondarroako Txomin Agirre udal liburutegiak, esaterako, azaroaren 25ari buruzko irakurketa gida berezi bat prestatu du. Lan guztiek modu batera edo bestera emakumeenganako indarkeria, berdintasuna edo aniztasuna bezalako gaiak jorratzen dituzte, eta Etxelilan daude eskuragarri.
EGITARAUA
- Amoroto
- Azaroak 27, barikua. 18:30ean, hitzaldi- tertulia, kultur etxean: Indarkeria matxista herri txikietan. Egoera eta baliabideak. Arantza Bengoetxearen eskutik (Lea Ibarreko Mankomunazgoko Zerbitzu Juridikoko abokatua).
- Aulesti
- Azaroak 25, eguaztena. 19:00etan, Indarkeria matxistari ez! Aski da! lelopean, elkarretaratzea plazan.
- Azaroak 29, domeka. 11:00etan, erabilera anitzeko gelan, Kontrako eztarritik liburua, Txoko Morean. Nerea Ibarzabal egongo da. Aulestiko Mugimendu Feministak eta Aulestiko Berdintasun Batzordeak antolatuta.
- Etxebarria
- Azaroak 25, eguaztena. 19:00etan, elkarretaratzea Plazabarrin, Emare talde feministak antolatuta.
- Azaroak 29, domeka. 18:00etan, Sasiak eta haziak dokumentala probalekuan. Emare talde feministak antolatuta.
- Lekeitio
- Azaroak 25, eguaztena. 19:00etan, Eskolapean Altxa Ahotsa! Ez gara erasotzaileen konplize elkarretaratzea, Potxuak Martxanek antolatuta.
- Azaroak 26, eguena. 17:30ean, Azkue aretoan, Indarkeria matxista detektatzeko eta prebenitzeko estrategiak hitzaldia, Lekeitioko Udalak eta Gurutze Gorriak antolatuta. Izena emateko lekeitioberdintasuna@gmail.com idatzi edo 662 429 368 telefono zenbakira deitu behar da.
- Markina-Xemein
- Azaroak 25, eguaztena. 19:00etan, elkarretaratzea Goiko Portalean, Markina-Xemeingo Udalak antolatuta.
- Azaroak 29, domeka. 18:30ean, Birritan Bortxatua antzerkia, Uni frontoian, doan. Aforo mugatua. Sarrerak udaletxeko Berton bulegoan eskuratu behar dira (08:15etik 14:30era).
- Mendexa
- Azaroak 25, eguaztena. 12:00etan, elkarretaratzea, udaletxe aurrean.
- Munitibar
- Azaroak 25, eguaztena. 19:00etan, elkarretaratzea bide gurutzean.
- Abenduak 4, barikua. Hitzaldi- tertulia, udal aretoan. Arantza Bengoetxearen eskutik Lea-Ibarrako baliabideak indarkeria matxistaren kontra.
- Mutriku
- Azaroak 25, eguaztena. 19:00etan, elkarretaratzea, Goiko Plazan.
- Ondarroa
- Azaroak 25, eguaztena. 19:00etan, elkarretaratzea Alamedan.
- Azaroak 26, eguena. 19:30ean, Beikozinin, Aldatzen laguntzen antzerki taldearen Birritan bortxatua antzezlana ikusgai. Oharra: gonbidapenak aurretik jaso behar dira Etxelilan.
- Azaroak 27, barikua. 18:00etatik aurrera, Etxelilan, Beldur Barik lehiaketako sari banaketa.
