Testu liburuak maileguan merkeago jasotzeko ekimena abiarazi dute Ondarroako Institutuan
Liburu Solidarioa proiektuan parte hartu duten DBH 3ko eta 4ko 100 ikaslek %60 eta 70 artean aurreztu dute testu liburuetan. Proiektua Batxilergo mailetara zabaltzeko asmoa agertu dute.
Ondarroako Abantin guraso elkarteko kideak Abantin Ondarroako Institutuko guraso elkarteko kideek testu liburuak mailegu bidez jasotzeko egitasmo berria abiarazi dute: Liburu Solidarioa. Egitasmoa, momentuz, DBH 3an eta 4an abiarazi dute. “LHtik hasi eta DBH2ra arte Hezkuntza Sailak kudeatzen du testu liburuen zerbitzua, baina goragoko mailetan ez dago bestelako aukerarik. Hutsune bat zegoela ikusi genuen, eta horri erantzun nahian sortu zen proiektua. Ikasle baten gurasoak eman zigun ideia. Antzeko ekimena, itxura danez, hainbat urtean Markina-Xemeinengo Institutuan ere egiten da, eta euren adibidea jarraitu dugu”.
Aurreko urteko ikasleei liburuak bigarren eskuan erosi, eta horiek, ostean, beste batzuei saldu dizkiete diru kopuru txiki bat ordainduta; guraso elkarteak prozesu horretan guztian bitartekari lanak egin ditu. Proiektuaren muina alde ekonomikoa dela azpimarratu dute, baina, aldi berean, berrerabiltzea eta birziklatzea bultzatu nahi izan dute, Agenda 30ari ere keinu eginez.
DBH3 eta 4ko 100 ikaslek parte hartu dute egitasmoan, eta horri esker, ikasturtean erabiliko dituzten liburuak prezio merkeagoan lortu ahal izan dituzte. Ikasleek 60 euro ordainduta, ikasturteko liburu guztiak lortu ahal izan dituzte. Guraso elkarteko kideek kalkuluak atera dituzte, eta horien arabera, ikasleek %60 eta 70 artean aurreztu ahal izan dute liburutan. “DBH3ko ikasleek, berez, 200 bat euro gastatu behar izango zituzten eta DBH4koek, ostera, 150 euro inguru”. Ordainetan, konpromiso bakarra eskatu diete ikasleei: liburuak ondo zaintzea, berriro erabili ahal izateko.
Esperientzia aberasgarria izan dela azpimarratu dute, eta orain balorazio positiboa egin dute. “Ikasle guztiekin pentsatuta, ilusio guztiagaz ipini dugu abantean proiektua. Egindako lana fruituak ematen ari dela ikusi dugu, eta oso pozik gaude. Udaberrian egingo dute datorren ikasturterako deialdia. “Gure helburua da ikasle guztiek parte hartzea proiektuan. Ea datorren ikasturtean jende gehiagok izena ematen duen. Etorkizunean Batxilergoko mailetara ere zabaldu nahi dugu eskaintza. Gaia lantzen ari gara, eta saiatuko gara zerbait egiten”.
