Lea-Artibai eta Mutrikuko plazak hartu dituzte 'Bateragune auzia'-ren aurkako protestek
Dozenaka herritar 'Demokrazia!' lelopean kalera irten dira Espainiako Auzitegi Gorenari erantzun irmo bat emateko eskatzeko.
'Bateragune auzia' errepikatzeko erabakiaren aurka Ondarroako Itsasaurre plazan egindako elkarretaratzea. Argazkia: Ondarroako EH Bildu. Euskal Herriko hamaika txokotan egin modura, Bateragune auziko epaiketa berriz egiteko erabakia salatzeko elkarretaratzeak egin zituzten zapatuan [abenduak 19] Lea-Artibain eta Mutrikuko hainbat herritan. Markina-Xemeingo Arkupe aurrean, Ondarroako Itsasaurre plazan, Aulestiko plazan, Mutrikuko Beheko Plazan, Etxebarriko Plaza Barrin eta Lekeitioko Eskolapean batu ziren dozenaka herritar Demokrazia! lelopean kalera irten ziren Espainiako Auzitegi Gorenari erantzun irmo bat emateko eskatzeko.
Bateragune auzia dela eta, alderdi politikoak, euskal gehiengo sindikalak eta eragile sozialek deituta egin zituzten elkarretaratzeak. Aldarrikapenekin bat egin zutenek, gainera, auzipetu zein haien gertukoei babesa adierazi nahi izan zieten.
Bateragune auziaren aurka Mutrikuko Beheko Plazan egindako protesta. Argazkia: Mutrikuko EH Bildu.
Bateragune auziaren aurka Lekeitioko Eskolapean egindako protesta. Argazkia: Whatsapp.
Markina-Xemeingo Arkupe aurrean egindako elkarretaratzea.
