Elkarretaratzea egin dute Ondarroan, apustu etxea ixtea eskatzeko
50 lagun inguru batu dira herriko apustu etxearen aurrean egindako protesta zaratatsuan.
Ondarroako apustu etxearen aurkako protesta. Argazkia: Ondarroako Apustu etxeen aurkako plataforma. Elkarretaratze zaratatsua egin zuten zapatuan [otsailak 13] Ondarroan, Jaurlaritzak aurretik ezarritako neurri murriztaileak malgutu eta apustu etxeak zabaltzeko baimena eman duela salatzeko. Augustin Zubikarai enparantzan dagoen apustu etxearen aurrean Benetako biruse zeuek zaze. Apustu etxi eta joko makinak herritxik kanpoa! zioen pankartaren atzean batu ziren 50 lagun inguruk parte hartu zuten elkarretaratzean.
Jaurlaritzari onartu berri duen erabakia “onartezina” dela eta alde batera utz dezala eskatu zioten. Egoera hori gaitzetsi nahian, txistuka aritu ziren eta Jaurlaritzaren erabakiaren atzean interes ekonomikoak ezkutatzen direla azpimarratu zuten. “Jaurlaritzak hainbat neurri murriztaile ezarri dituen bitartean, eta COVID-19an ondorioz sortutako pandemia nahiz eta unerik gogorretariko batean egon, apustu etxeak berriro ere irekitzea erabaki du. Betiko moduan, interes ekonomikoa jendearen ongizate eta osasunaren aurretik ipini dute. Gure aldetik argi daukagu apustu etxeen eta joko makinen pandemiari aurre egiten saiatuko garela”.
