Pentsio publiko duin eta nahikoak bermatu arte kalean jarraituko dutela berretsi dute
Egungo pentsio sistemak dituen gabezien eta Toledoko Itunaren murrizketen aurka agertu dira Lekeitioko, Mutrikuko eta Ondarroako mobilizazioetan batu diren herritarrak. Eskaerak onartu arte plazak betetzen jarraitzeko deia egin dute.
Pentsiodunek Ondarroan egindako manifestazioa Hiru urteren ostean ere Hego Euskal Herriko Pentsiodunen Mugimenduak “kalean” jarraitzen duela aldarrikatu zuen zapatuan [otsailak 13], eta pentsio publiko duin eta nahikoak bermatu arte kalean jarraituko dutela gogora ekarri nahi izan zuten tokian tokiko mobilizazioekin. “Lortutakoa ez da nahikoa, eta pentsio sistema publikoa ahalik eta gehien murriztu nahi dutenek espero dute guk kaleetatik alde egitea”. Borrokan jarraituko dutela nabarmendu dute, eta astelehenero plazak betetzen jarraitzeko deia egin zuten.
Ondarroan, Lekeition eta Mutrikun dozenaka herritarrek bat egin zuten pentsiodunek deitutako mobilizazioekin. 500 bat lagun batu ziren Ondarroako Zaldupeko zutibitik irten zuen manifestazioan, 80 lagun inguru Mutrikuko Goiko Plazatik abiatu zen manifestazioan eta 65 bat lagun Lekeitioko udaletxe aurrean egindako elkarretaratzean. Aldarri berberak atera zituzten kalera hiru herrietan.
Mutrikuko pentsiodunen manifestazioaren amaiera. Argazkia: Alberto Gorritiberea.
Egungo pentsio sistemak dituen gabeziak ozen salatu zituzten kalerik kale eta, aldi berean, Toledoko Itunaren murrizketen aurka ere agertu ziren. “Toledoko Itunak gure aldarrikapen nagusiak baztertu ditu, eta Espainiako Kongresuan bozkatu ostean, Jasangarritasun Faktorea, miseriazko pentsioak eta 2011ko eta 2013ko erreformak indarrean jarraitzen dute eta beste erreforma batzuei ateak irekitzen zaizkie”
Espainiako Gobernuari, Eusko Jaurlaritzari eta Nafarroako Gobernuari eta horien parlamentuei eskari zuzena egin zieten. Besteak beste, gutxieneko pentsioa 1.080 eurokoa izatea, pentsioen birbalorizazio automatikoa, 40 urteko kotizazioa dutenen erretiro aurreratuaren koefiziente murriztaileak indargabetzea, jasangarritasun faktorea ezabatzea eta soldatetan eta pentsioetan dagoen genero arrakalarekin amaitzea eskatu dute.
Pentsiodunen elkarretaratzea Lekeition. Argazkia: Karpanta.
