Saharar auzia aztergai, Mutrikuko Zine Forum Taldearen hurrengo emanaldian
Tindufen zein Euskal Herrian errodatutako 'Haizearen egia' film laburra proiektatuko dute domekan, kultur etxean. Doako gonbidapenak barikuan egongo dira eskuragai, Beheko Plazan.
Tahar gazte saharar gaztearen istorioa kontatzen duen Haizearen egia film laburra proiektatuko dute domekan [otsailak 21], Mutrikuko Zabiel kultur etxeko proiekzio aretoan. Zine Foru Taldekoek 19:00etan ipini dute hitzordua, eta aurreratu dutenez, saharar herriak bizi duen gatazka egoerari buruzko mahai-ingurua ere egingo dute 22 minutuko lanaren proiekzioaren ostean. Solasaldira saharar herriarekin kolaboratzen duten herriko eta eskualdeko taldeetako kideak gonbidatu dituzte.
Tindufen zein Euskal Herrian errodatutako eta Ekain Albite zumaiarrak zuzendutako lana ikusteko interesa dutenek aldez aurretik lortu beharko dituzte doako gonbidapenak. Barikuan [otsailak 19], 18:30etik 19:30era, Beheko Plazan ipiniko duten mahaian lortu ahalko dira sarrerak. Aforo kontuagatik, gonbidapen kopuru mugatua dago. “Printzipioz, proiekzio bakarra eskainiko dugu. COVID-19a dela eta, 36 lagunentzako tokia dago. Gonbidapenen guztiak banatu gabe geratuz gero, domekan bertan horretarako aukera egongo da, proiekzioa hasi baino ordu laurden arinago”.
Domekan Mutrikun proiektatuko duen film laburrak Lekeitioko Euskal zine Bileran epaimahaiaren Aipamen Berezia eskuratu zuen. Saharako herria eta Euskal Herria lotzen ditu ikus-entzunezkoak. Gaztea zela Euskal Herrira ikastera etorri, eta 20 urterekin Tindufeko errefuxiatuen kanpalekuetara itzuliko den Tahar gaztearen istorioa kontatzen du film laburrak. Gazteak Tindufera itzultzen den unean sortutako bizipenak ditu ardatz zintak.
Gai sozialak. Zine Forum Taldeko kideek lanean jarraitzen dute, eta datozen hilabeteetarako gai sozialekin lotutako ziklo bat antolatu dutela jakitera eman dute. “Datozen hiru hilabetetan gai sozial batekin lotura duen lan bat proiektutako dugu, hilean bat. Apirilean, esaterako, Nebraska filma proiektutatuko dugu; herriko talde batekin Alzheimerraren gaia elkarlanean jorratzeko asmoa dugu. Maiatzerako, berriz, Caminho longe lana aukeratu dugu; errefuxiatuen gaia izango dugu mintzagai”.
