Araban, Bizkaian eta Gipuzkoan ere AstraZeneca txertoa jartzeari utzi diote
Frantziak, Espainiak, Italiak eta Alemaniak "prebentzioz" hartu dute AstraZeneca botika etxearen txertoa ez jartzeko erabakia, ustezko nahi gabeko ondorioengatik. Europan txertoa jarri duten bost milioi pazienteen artean, 30 bat tronbosi kasu erregistratu dituzte, EMAren arabera.
Araban, Bizkaian eta Gipuzkoan hamabost egunez utziko diote AstraZeneca txertoa jartzeari. Hala erabaki du Carolina Darias Espainiako Osasun ministroak erkidegoetako Gobernu buruekin gaur arratsaldean [martxoak 15] egindako bileran. Erabakia hartu eta berehala, Eusko Jaurlaritzako Osasun sailak Osakidetzari agindu dio AstraZeneca txertoa jartzeari uzteko. Txerto hori hartu dutenei “lasai” egoteko eskatu diete.
Frantziak, Italiak eta Alemaniak ere AstraZeneca txertoa erabiltzeari utzi diote, nahi gabeko zenbait ondorio eragiten dituen kezkatan. Frantziako Emmanuel Macron presidenteak esan du gutxienez bihar arte AstraZeneca txertoa jartzeari utziko diotela. Hau da, Sendagaien Europako Agentziak (EMA) txertoaren nahi gabeko ondorioei buruzko txostena aurkeztu arte.
AstraZeneca erabiltzen ari ez diren herrialdeak: Espainia, Alemania, Italia, Frantzia, Danimarka, Norvegia, Herbehereak eta Islandia
Alemaniako Gobernuko Osasun ministerioak zehaztu du EMAk erabakiko duela txerto horri zer-nolako bilakaera eman. Izan ere, Europan txertoa jarri duten bost milioi pazienteen artean, 30 bat tronbosi kasu atzeman dituzte, EMAren arabera. Zehaztu dute txertoa jarri dutenen artean tronbosi kasuen tasa ez dela «populazio osoan baino altuagoa». Halere, gertatutakoa “zehatz-mehatz” aztertzeko beharra azpimarratu dute.
Alemania eta Frantzia ez dira AstraZeneca txertoa erabiltzeari uzten dion herrialde bakarrak; izan ere, Danimarkak, Norvegiak, Herbehereek eta Islandiak AstraZenecaren txertoa erabiltzeari utzi zioten iragan astean. Atzo, Irlandak ere erabaki bera hartu zuen. Danimarkako Osasun Zuzendaritza Nagusiak iragan astean jakinarazi zuenez, behin-behineko erabakia da, eta hamalau egunerako hartu dute. Arrazoia ere azaldu zuten: «Tronbosi kasu larriak» atzeman dituzte. Gainera, uste dute horietako bat heriotza batekin lotuta egon daitekeela. Hala ere, oraindik ez dute baieztatu txertoa eta arazo horiek lotuta daudenik.
AstraZeneca farmazia enpresak atzo segurtatu zuen “ez dagoela loturarik” txertoaren eta tronbosi kasuen artean.
